Ռուս միլիարդատերը որոշել է զբաղվել հայկական քաղաքականությամբ. «Ես պատրաստ եմ կորցնել ամեն ինչ»
ՀԱՍԱՐԱԿՈՒԹՅՈՒՆeadaily.com-ը գրում է, որ ռուս հայտնի գործարար և բարերար Ռուբեն Վարդանյանը որոշել է իր պատմական հայրենիքում քաղաքականությամբ զբաղվել, սակայն նա չի հավակնում Հայաստանի վարչապետի կամ նախագահի պաշտոններին: Այս մասին ինքը` Վարդանյանն է հայտարարել Անդրկովկասյան այդ հանրապետության Հանրային հեռուստաալիքին տված հարցազրույցում:
Ռուբեն Վարդանյանի քաղաքականությամբ զբաղվելու որոշումը (ըստ Forbes ամսագրի ռուսերեն տարբերակի նա Ռուսաստանի 200 ամենահարուստ գործարարների ցուցակում ներկայումս 1 մլրդ դոլար կարողությամբ զբաղեցնում է 116-րդ տեղը) հասունացել է 2020 թվականի 44-օրյա պատերազմից և Լեռնային Ղարաբաղի տարածքների զգալի մասի կորստից հետո: Գործարարի խոսքով ՝ ինքը կշռադատել է բոլոր վտանգները և հնարավոր դժվարությունները, սակայն անցյալ տարվա պատերազմը դարձել է «կարմիր գիծ»: Վարդանյանը կարծում է, որ իր հեղինակավոր կարծիքը կարող է դեր խաղալ հանրապետությունում քաղաքական որոշումներ կայացնելու գործում: Այդ համատեքստում գործարարը չի բացառել իր աջակցությունը Հայաստանում գործող քաղաքական այն ուժերին, որոնք կներկայացնի իրեն մոտ գաղափարներ: «Ես ոչ մի կուսակցության անդամ չեմ, կուսակցություն չունեմ, բայց վստահ եմ, որ ես կաջակցեմ այն ուժերին, որոնք ձևավորվում են ոչ թե անհատների, այլ գաղափարների շուրջ», - նշել է ռուս միլիարդատերը:
Միևնույն ժամանակ, նա չի բացառել, որ «կարող են լինել ճնշումներ և որոշակի դժվարություններ», բայց Վարդանյանը չի պատրաստվում հետ կանգնել իր որոշումից: Նա հորդորել է իրեն չկապել աշխարհաքաղաքական այս կամ այն կենտրոնի հետ և չհամարել այս կամ այն երկրի հովանավորյալը: «Հայաստանի և Արցախի ապագան ինձ համար շատ ավելի կարևոր է, քան իմ հարստությունը, իմ ընտանիքի անվտանգությունը և բոլոր անձնական խնդիրները ... Ես հատել եմ «կարմիր գիծ»-ը, որը նշանակում է, որ ես պատրաստ եմ կորցնել ամեն ինչ: Ես պատրաստ եմ բանտ նստել, եթե քաղաքական պայքարն ընթանա անցանկալի սցենարով: Պատրաստ եմ քննադատության», - ասել է գործարարը: Վարդանյանը նաև ընդունել է իր մեղքի բաժինը այն իրավիճակի համար, որում այժմ հայտնվել են Հայաստանն ու Լեռնային Ղարաբաղը:
Նյութը հրապարակման պատրաստեց Կամո Խաչիկյանը