Երեխա է ծնվել, բնակարանի հիփոթեք ունեք. պետությունը կարող է մարել մինչև 2 միլիոն դրամ

Հիփոթեքային վարկ մարող ընտանիքում երեխա ծնվելու դեպքում պետությունը միանվագ գումար է հատկացնում՝ վարկի մնացորդային մայր գումարի մարմանը։ Գումարը կարող է հասնել երկու միլիոն դրամի, սակայն դիմելու ժամկետը սահմանափակ է՝ մինչև երեխայի 1 տարին լրանալը, և բաց թողնելը նշանակում է կորցնել այն ամբողջությամբ։

Ինչպես տեղեկացնում է Iravaban.net-ը, աջակցությունը սահմանված է ՀՀ կառավարության N 968-Լ որոշմամբ հաստատված՝ երեխա ունեցող ընտանիքների բնակարանային ապահովության 2024-2026 թվականների պետական աջակցության ծրագրերով։

Որքա՞ն է աջակցության չափը

Չափը կախված է երկու բանից՝ երեխայի կարգաթվից և բնակավայրից։

Եթե նոր ծնված երեխան առաջինն է կամ երկրորդը, աջակցությունը կազմում է վարկի մնացորդային մայր գումարի 10 տոկոսը, բայց ոչ ավելի, քան 500 հազար դրամ։ Երևանում այդ ցուցանիշը 5 տոկոս է՝ նույն 500 հազարի առաստաղով։

Եթե երեխան երրորդն է կամ հաջորդը, աջակցությունը կազմում է մնացորդային մայր գումարի 50 տոկոսը, բայց ոչ ավելի, քան 2 միլիոն դրամ։ Երևանում՝ 25 տոկոս, նույն առաստաղով։

Իսկ եթե բնակելի գույքը ձեռք է բերվել կամ տունը կառուցվում է սահմանամերձ բնակավայրում կամ որոշման ցանկում ընդգրկված գյուղական բնակավայրում, աջակցությունը ավելացվում է 50 տոկոսով։

Չափահաս երեխաներն էլ են հաշվվում

Սա ծրագրի ամենաքիչ հայտնի դրույթներից է։ Կարգաթիվը որոշելիս հաշվի են առնվում նաև շահառուի չափահաս զավակները։

Այսինքն՝ եթե ունեք երկու մեծացած երեխա և ծնվում է երրորդը, դուք ընկնում եք ոչ թե 500 հազարանոց, այլ երկու միլիոնանոց խմբի մեջ։

Իսկ միաժամանակ մեկից ավելի երեխա ծնվելու դեպքում երկրորդի և յուրաքանչյուր հաջորդի համար աջակցությունը հաշվարկվում է առանձին՝ որպես մնացորդային գումար դիտարկելով դիմելու օրվա մնացորդի և առաջին երեխայի համար արդեն հաշվարկված գումարի տարբերությունը։

Ի՞նչ պայմաններ պետք է բավարարել

Ծրագիրը սահմանում է հինգ պայման։

Դիմելու ժամկետը՝ մինչև երեխայի 1 տարին լրանալը ներառյալ։

Դիմելու օրվա դրությամբ պետք է առնվազն 12 ամիս կատարած լինեք հիփոթեքային վարկի մարումներ, ընդ որում վերջին 12 ամսում ուշացած օրերի ընդհանուր քանակը չպետք է գերազանցի 30 օրացուցային օրը։

Գույքի արժեքը՝ առավելագույնը 35 միլիոն դրամ, որն ավելացվում է երրորդ և հաջորդ յուրաքանչյուր երեխայի հաշվով 5 միլիոն դրամով։

Գույքը պետք է լինի ձեզ, իսկ գրանցված ամուսնության դեպքում՝ նաև ամուսնուն պատկանող միակբնակելի անշարժ գույքը՝ անձնական, ընդհանուր համատեղ կամ ընդհանուր բաժնային սեփականության իրավունքով՝ 50 տոկոս և ավելի մասնաբաժնով։

Եվ վերջինը՝ վարկի գործողության ընթացքում բնակարանն օտարելու դեպքում ստացած պետական աջակցության գումարը ենթակա է վերադարձման պետությանը։

Ո՞ւր դիմել

Երեխայի ծնվելուց հետո շահառուն դիմում է հիփոթեքային վարկ տրամադրած բանկ կամ վարկային կազմակերպություն։

Եթե այդ կազմակերպությունը նախարարության հետ պայմանագիր կնքած է, ապա անհրաժեշտ տեղեկություններն ինքն է փոխանցում, և շահառուն նախարարություն չի դիմում։ Իսկ եթե պայմանագիր կնքած չէ, կազմակերպությունը տալիս է տեղեկանք վարկի և մնացորդային գումարների մասին, որը շահառուն թղթային կամ էլեկտրոնային եղանակով ներկայացնում է նախարարություն։

Այնուհետև նախարարությունը 10 աշխատանքային օրվա ընթացքում քաղաքացիական կացության ակտերի գրանցման մարմիններից և Կադաստրի կոմիտեից ինքնաշխատ եղանակով ստանում է անհրաժեշտ տվյալները, ստուգում է համապատասխանությունը և ընդունում որոշում։ Դրական որոշման դեպքում գումարը փոխանցվում է կազմակերպության բանկային հաշվին, իսկ շահառուն տեղեկացվում է էլեկտրոնային փոստով։

Հաճախ տրվող հարցեր

• Այլ բնակարանային ծրագրից արդեն օգտվել եմ։ Կարո՞ղ եմ դիմել։
• Այո։ Ծրագիրն ուղղակի սահմանում է, որ շահառուն իրավունք ունի օգտվել հիփոթեքի մարման աջակցությունից՝ անկախ բնակարանային ապահովության պետական աջակցության այլ ծրագրերից օգտվելու հանգամանքից։
• Վարկն արտարժույթով է։ Ինչպե՞ս է հաշվարկվում։
• Այդ դեպքում տեղեկանքում մնացորդային չափը տրվում է դրամով՝ հիմք ընդունելով տեղեկանքի տրամադրման օրվա դրությամբ Կենտրոնական բանկի սահմանած փոխարժեքը։

Ամփոփում

Ամփոփելով՝ պետք է նշել, որ հիփոթեքային վարկ մարող ընտանիքում երեխա ծնվելու դեպքում պետությունը միանվագ գումար է հատկացնում վարկի մնացորդային մայր գումարի մարմանը, առաջին և երկրորդ երեխայի դեպքում՝ մնացորդի 10 տոկոսը, Երևանում՝ 5 տոկոսը, բայց ոչ ավելի, քան 500 հազար դրամ, երրորդ և հաջորդ երեխայի դեպքում՝ 50 տոկոսը, Երևանում՝ 25 տոկոսը, բայց ոչ ավելի, քան 2 միլիոն դրամ, սահմանամերձ և ցանկում ընդգրկված գյուղական բնակավայրերում աջակցությունն ավելացվում է 50 տոկոսով, կարգաթիվը որոշելիս հաշվվում են նաև չափահաս զավակները, իսկ դիմել պետք է հիփոթեքային վարկ տրամադրած կազմակերպությանը՝ մինչև երեխայի 1 տարին լրանալը ներառյալ, – տեղեկացնում է Iravaban.net-ը։

Ծանուցում. սույն նյութը պատրաստված է միայն իրավական իրազեկման նպատակով և չի հանդիսանում իրավաբանական խորհրդատվություն։ Բնակարանային աջակցության ծրագրերի, հիփոթեքային վարկերի և պետական աջակցության հետ կապված կոնկրետ իրավիճակներում իրավաբանական խորհրդատվություն ստանալու համար կարող եք դիմել «ԼԻԳԼ ԸԼԱՅԸՆՍ» իրավաբանական ընկերությանը՝  գրելով [email protected] էլեկտրոնային փոստի հասցեին։