«Քաղաքագետը գնահատել է Հայաստանի տնտեսության վիճակը»

Քաղաքագետ Բենիամին Մաթևոսյանը ՌԻԱ Նովոստիին տված հարցազրույցում կարծիք է հայտնել, որ Հայաստանի տնտեսական վիճակը կվատանա Ռուսաստան գյուղատնտեսական արտադրանքի մատակարարման հետ կապված խնդիրների պատճառով, գրում է 1prime.ru–ն։ «2025 թվականի հունիսի 1-ից մինչև հունիսի 30-ը ընկած ժամանակահատվածը համեմատվել է 2026 թվականի նույն ժամանակահատվածի հետ ըստ ՀՀ Սննդամթերքի անվտանգության տեսչության տվյալների, և պարզվել է, որ ռուսական շուկա հայկական գյուղատնտեսական արտադրանքի ներմուծման արգելքից հետո Հայաստանից գյուղատնտեսական արտադրանքի և ծաղիկների արտահանման անկումը կազմել է 74.5%։», - ասել է Մաթևոսյանը հավելելով, որ ըստ ՀՀ վիճակագրական կոմիտեի, 2026 թվականի առաջին հինգ ամիսներին Ռուսաստանի հետ Հայաստանի առևտրաշրջանառությունը նվազել է 567 միլիոն դոլարով հասնելով 2.2 միլիարդ դոլարի։

«ՀՀ տնտեսության իրավիճակը միայն կվատանա, քանի որ Ռուսաստանը ոչ միայն չի վերացնում սահմանափակումները, այլ նաև շարունակում է ակտիվորեն քննարկել և աշխատել «ԵԱՏՄ-ին Հայաստանի անդամակցության սառեցման» ուղղությամբ», - ասել է գործակալության աղբյուրը։

Քաղաքագետը նաև հավելել է, որ ՀՀ վարչապետ Նիկոլ Փաշինյանի այցը Ռուսաստան և հանդիպումը ՌԴ վարչապետ Միխայիլ Միշուստինի հետ ոչինչ չի փոխել, չնայած խորհրդարանական ընտրություններից առաջ Փաշինյանը հայտարարել էր, որ «հուլիսի կեսերին կհանդիպի Վլադիմիր Պուտինի հետ և Ռուսաստանի նախագահին անվանել էր իր ընկերը»։ «Մոսկվան հստակորեն հայտարարում է ներկայիս ճգնաժամից դուրս գալու իր պահանջները, այն է վերանայել կամ չեղարկել ՀՀ-ի ԵՄ-ին անդամակցության մասին օրենքը, անցկացնել համազգային հանրաքվե ԵՄ-ին կամ ԵԱՏՄ-ին անդամակցության վերաբերյալ և Հայաստանում պահպանել հարմարավետ միջավայր ռուս ներդրողների և բիզնեսի համար։ Բայց այդ ամենը ուղղակիորեն հակասում է Նիկոլ Փաշինյանի կառավարության արտաքին քաղաքականությանը, ուստի հարաբերություններում ճգնաժամը միայն կվատանա», - կարծիք է հայտնել Մաթևոսյանը։

Հիշեցնենք, որ Ռոսսելխոզնադզորի ղեկավար Սերգեյ Դանկվերտը նախկինում «Ռոսիյսկայա գազետա»-ին տված հարցազրույցում հայտարարել էր, որ հայկական գյուղատնտեսական արտադրանքի առաքման սահմանափակումները քաղաքական դրդապատճառներ չունեն, այլ պայմանավորված են արտադրողների շրջանում որակի արդյունավետ վերահսկողության բացակայությամբ։

Նյութը հրապարակման պատրաստեց Կամո Խաչիկյանը

www.1or.am