Նրա ժամանակն անխուսափելիորեն կգա. Վաղ թե ուշ Արմանը կնվաճի տիտղոսը Բոգդան Պլուտախին
ՍՊՈՐՏ
ACA-ի թեթև քաշային կարգի մարտիկ Բոգդան Պլուտախինը կիսվել է իր կարծիքով UFC-ի թեթև քաշային կարգի դասակարգման առաջատարներից Արման Ծառուկյանի և Իլիա Թոփուրիայի հնարավոր դիմակայության վերաբերյալ։
Պլուտախինը վստահ է, որ այս պահին հայազգի մարտիկը դիվիզիոնի լավագույն ներկայացուցիչն է, իսկ Թոփուրիան նրա դեմ մենամարտում հաղթելու չնչին հնարավորություններ ունի։
«Եթե խոսենք այս պահին թեթև քաշային կարգի ուժեղագույն մարտիկի մասին, ապա ինձ համար դա Արման Ծառուկյանն է։ Ընդ որում՝ առանց վերապահումների։ Նա դիվիզիոնի ամենաունիվերսալ, ֆիզիկապես հզոր և համակարգված մարտիկն է», — նշել է Պլուտախինը «Матч ТВ»-ին տված հարցազրույցում:
Մարտիկը նաև ընդգծել է, որ Ծառուկյանի չեմպիոն դառնալը ժամանակի հարց է.
«Նրա ժամանակն անխուսափելիորեն կգա։ Վաղ թե ուշ Արմանը կնվաճի տիտղոսը, պարզապես որովհետև UFC-ն այլ տարբերակներ չի ունենա։ Երբ մարտիկն այդքան կայուն է և ուժեղ, նրան անվերջ անտեսելն անհնար է»։
Խոսելով Իլիա Թոփուրիայի մասին, ով վերջերս հայտարարել էր մենամարտերի վերադառնալու մասին, Պլուտախինը նշել է, որ իսպանացին Ծառուկյանի դեմ կարող է հաջողության հասնել միայն մեկ դեպքում.
«Տեսնում եմ միայն մեկ սցենար, որի դեպքում նա կարող է հաղթել Արմանին. դա մենամարտի հենց սկզբում «լաքի-փանչն» է (պատահական հաջողված հարված — խմբ.): Այլ իրական տարբերակներ չեմ տեսնում։ Երկարատև մենամարտում, տարածության վրա, ըմբշամարտում և տեմպի մեջ առավելությունը Ծառուկյանինն է լինելու։ Եվ սա ոչ թե էմոցիա է, այլ ոճերի և հմտությունների սառը վերլուծություն»։
Հիշեցնենք, որ Արման Ծառուկյանն այս պահին զբաղեցնում է UFC-ի թեթև քաշային կարգի վարկանիշային աղյուսակի առաջին հորիզոնականը (չեմպիոնից հետո):
