Մխիթարյանի գործող պայմանագիրը մոտենում է ավարտին. ի՞նչ են որոշել «Ինտերում» նրա վերաբերյալ
ՍՊՈՐՏ
Միլանի «Ինտերը» կանգնած է կադրային լուրջ փոփոխությունների շեմին, և այդ գործընթացի կենտրոնում կարող է հայտնվել Հայաստանի հավաքականի նախկին ավագ Հենրիխ Մխիթարյանը։
Իտալական հեղինակավոր Tuttosport-ի փոխանցմամբ՝ «ներաձուրիները» ծրագրում են ամռանն արմատապես թարմացնել միջին օղակը, և Մխիթարյանը, ամենայն հավանականությամբ, մրցաշրջանի ավարտին կլքի ակումբը։
Մխիթարյանի գործող պայմանագիրը մոտենում է ավարտին, և ակումբի ղեկավարությունն արդեն դիտարկում է նրան փոխարինողի տարբերակներ։ Հիմնական թեկնածուն համարվում է Էբենեզեր Ակինսանմիրոն, ով ներկայումս վարձավճարով փայլուն ելույթներ է ունենում «Պիզայում»։ «Ինտերը» հույս ունի, որ երիտասարդ տաղանդը կկարողանա լրացնել փորձառու հայ ֆուտբոլիստի բացը։
Հեռացողների ցուցակում միայն Մխիթարյանը չէ։ Լուրջ փոփոխություններ են սպասվում նաև թիմի մյուս առանցքային ֆիգուրներին։ Մասնավորապես, ըստ շրջանառվող լուրերի, Հաքան Չալհանօղլուն արդեն նախնական պայմանավորվածություն ունի «Գալաթասարայի» հետ, իսկ Բեպե Մարոտան որպես թուրք ֆուտբոլիստի իդեալական փոխարինող դիտարկում է «Ռոմայի» կիսապաշտպան Մանու Կոնեին։
Բացի այդ, անորոշ է նաև Դավիդե Ֆրատեզիի ապագան. քիչ խաղաժամանակից դժգոհ իտալացին նույնպես լրջորեն մտածում է ակումբային գրանցումը փոխելու մասին։
Առաջիկա ամիսները վճռորոշ կլինեն Միլանի «Ինտերի» համար՝ հասկանալու՝ արդյոք թիմը կգնա ամբողջական վերակառուցման, թե կնախընտրի փուլային փոփոխությունները, սակայն ակնհայտ է, որ Մխիթարյանի և ներկայիս կորիզի ուղիները ակումբի հետ աստիճանաբար բաժանվում են։
