«Զանգեզուրի միջանցքը» նոր հնարավորություններ կստեղծի ողջ տարածաշրջանի համար․ Էրդողան
ՄԻՋԱԶԳԱՅԻՆ
Ինչպես հաղորդում է TRT Haber-ը, Թուրքիայի նախագահ Ռեջեփ Թայիփ Էրդողանը «Զանգեզուրի միջանցքը» դիտարկում է ոչ միայն որպես աշխարհաքաղաքական, այլև աշխարհատնտեսական բեկման մաս:
«Հայաստանը, թեև ի սկզբանե դեմ էր «Զանգեզուրի միջանցքին», բայց ավելի ճկուն մոտեցում է ցուցաբերում տնտեսական ինտեգրմանը մասնակցելու հարցում», - ասել Է Էրդողանը: «Զանգեզուրի միջանցքի բացումը ռազմավարական քայլ կլինի․ Թուրքիայից ապրանքները կկարողանան Կասպից ծովով ավելի արագ հասցնել Կենտրոնական Ասիա և Չինաստան, իսկ Եվրոպայից Չինաստան եկող բեռները կսկսեն անցնել Թուրքիայով: Միջանցքի բացումն ընդգրկում է բազմաթիվ երկրներ՝ հարավից մինչև մեզ և Ադրբեջան։ Այստեղ ամենակարևոր տարրը Զանգեզուրի երթուղին է։ Այս երթուղին ներառում է նաև երկաթուղային համակարգ», - ընդգծել է նա։
Թուրքիայի նախագահը նաև հավելել է, որ խաղաղության համաձայնագիրը, որը կստորագրեն Հայաստանն ու Ադրբեջանը, կփոխի «մթնոլորտը տարածաշրջանում»: «Աշխարհը փոխվում է, և այս իրավիճակը նոր քայլեր է պահանջում։ Փոփոխություններին հետևելը նշանակում է ակտիվացնել ներուժը և բացել դռները շահույթի համար: Խաղաղության համաձայնագիրը, որը կստորագրեն Հայաստանն ու Ադրբեջանը, կփոխի մթնոլորտը տարածաշրջանում։ Մենք ականատես կլինենք ձեռք բերված խաղաղության շնորհիվ մեկը մյուսի հետևից նոր և պատմական հնարավորությունների բացահայտմանը։ Հակամարտությունների և պատերազմների պատճառով դատարկված տարածաշրջանների ներուժի ակտիվացմամբ հաջող մոդելի ևս մեկ հազվագյուտ օրինակ կհայտնվի», - եզրափակել է նա:
