Ռուսաստանը և Հայաստանը զարգացնում են համագործակցությունը շինարարության ոլորտում՝ օգտագործելով արհեստական ինտելեկտը
ՀԱՍԱՐԱԿՈՒԹՅՈՒՆ
Հյուսիսային Կովկասի դաշնային համալսարանը նախաձեռնել է գիտակրթական համագործակցություն Հայաստանի բուհերի հետ։ Այս մասին հայտնում է համալսարանի մամուլի ծառայությունը, գրում է News.1777.ru–ն։ Այսպես, հյուսիսային Կովկասի դաշնային համալսարանի պատվիրակությունը ռեկտոր Դմիտրի Բեսպալովի գլխավորությամբ աշխատանքային այցով եղել է Երևանում։
Ուղևորության ծրագրում նախատեսված էին հանդիպումներ ՀՀ ԳԱԱ-ում և հանրապետության առաջատար բուհերում: Այցի ընթացքում քննարկվել են համատեղ հետազոտությունների, ցանցային կրթական ծրագրերի մշակման, նշանակալի միջոցառումների անցկացման թեմաներ։
ՀՀ ԳԱԱ նախագահ Աշոտ Սագյանի հետ հանդիպմանը քննարկվել են ճարտարագիտական ոլորտում համատեղ գիտատեխնոլոգիական նախագծերի իրականացման, ինչպես նաև երկու երկրների պատմությանը նվիրված գիտաժողովներ կազմակերպելու հեռանկարները։ «Մեր համալսարանի և Հայաստանի գործընկեր բուհերի միջև համագործակցության ընդլայնման հիմնական վեկտորն ուղղված է շինարարության ոլորտում նորարարական նախագծերի իրականացմանը, ինչպես նաև արհեստական ինտելեկտի տեխնոլոգիաների կիրառմանը ինժեներական խնդիրների լուծման գործում»,– նշել է Բեսպալովը:
Երևանի պետական համալսարանի և Խաչատուր Աբովյանի անվան հայկական պետական մանկավարժական համալսարանի հետ համատեղ կազմակերպվել են կլոր սեղաններ՝ շրջանավարտների և ուսուցիչների շրջանում ՏՏ հմտությունների ձևավորման, ինչպես նաև բուհերում թվային էկոհամակարգերի ստեղծման վերաբերյալ:
Բեսպալովը բանակցություններ է վարել Խաչատուր Աբովյանի անվան հայկական պետական մանկավարժական համալսարանի, Ռուս-հայկական համալսարանի և Ճարտարապետության և շինարարության ազգային համալսարանի ղեկավարների հետ։ Կողմերը նախանշել են համատեղ հետազոտությունների ոլորտները և քննարկել ցանցային կրթական ծրագրերի հեռանկարները միջազգային հարաբերությունների, հոգեբանության, մանկավարժության, մաթեմատիկայի, համակարգչային գիտության, շինարարության և ճարտարապետության ոլորտներում:
Այցի ընթացքում տեղի է ունեցել հանդիպում Հայաստանում Ռուսաստանի արտակարգ և լիազոր դեսպան Սերգեյ Կոպիրկինի հետ։ Մասնակիցները քննարկել են հանրապետությունում ռուսաց լեզվի և ռուսաց կրթության հանրահռչակմանն ուղղված խոստումնալից գիտակրթական նախագծեր և միջոցառումներ։ Դիվանագիտական առաքելության ղեկավարը աջակցություն է հայտնել Հյուսիսային Կովկասի դաշնային համալսարանի մարդասիրական և գիտակրթական նախաձեռնություններին։
Նյութը հրապարակման պատրաստեց Կամո Խաչիկյանը
