Մղձավանջային լուսաբաց Ստեփանավանում․ կա զոհ և հոսպիտալացվածներ

Փետրվարի 8-ի վաղ լուսաբացին է հրդեհը բռնկվել Ստեփանավան քաղաքի Աշոտաբերդ թաղամասի փայտաշեն շենքում: Պատճառների մասին խոսելը պատասխանատուները վաղ են համարում:

Հին, խորհրդային տարիների փայտե կառույցը արագ է բռնկվել:

 Լոռու մարզպետ Արամ Ղազարյանը ասում է շենքից գրեթե ոչինչ չի մնացել:

«Նախնական տվյալներով 54 գրանցված բնակիչ կա շենքում, այս պահին ճշտումների փուլում ենք, ու էլի ըստ նախնական տվյալների՝ փաստացի 32 բնակվող է եղել»,- ասաց մարզպետը:

Ով է անհետ կորած քաղաքացին հարցին՝ մարզպետն ասաց կորած չէ:

«Անհետ կորած չկա: Ըստ նախնական տեղեկությունների և թոռնիկի պատմածով, 1954 թվականի ծնված կին կա, որին հնարավոր չի եղել հանել դուրս: Իրենք արագ դուրս են եկել, նա մնացել է: Նախնական պետք է լինի այդ մեկ մահը»,- ասաց մարզպետը:

Նախնական տվյալներով, 4 հոսպիտալացված կա:

Մարզպետը մեզ հետ զրույցում ասաց՝ Կառավարության կողմից արդեն ստացվել է հանձնարարական՝ գույքագրել բոլոր անօթևան մնացածների առաջնային կարիքներն ու ցուցաբերել աջակցություն:

Տարհանված բնակիչները ներկա պահին հյուրանոցում են: Արամ Ղազարյանն ասաց՝ հանդիպելու է բոլորի հետ, որպեսզի միասին որոշեն հետագա անելիքն ու յուրաքանչյուրին ըստ անհրաժեշտություն օգնություն ցուցաբերվի:

«Ոչ մեկն առանց տանիք ու աջակցության չի մնա»,- ասաց մարզպետը:

Ի դեպ, այս շենքի բնակիչների համար Կառավարության ֆինանսավորմամբ ավելի վաղ էր բնակարանաշինական ծրագիր մեկնարկել: 10 մլրդ դրամ արժողւթյամբ բնակապահովման ծրագրի արդյունքում բոլորն էլ հին փայտե շենքից տեղափոխվելու էին իրենց նոր տներ: