Արտակարգ իրավիճակ՝ Լոռու մարզում․ հոսպիտալացվածներ կան

Հուլիսի 29-ին խոշոր ավտովթար է տեղի ունեցել Լոռու մարզում: Ժամը 15:00-ի սահմաններում Վանաձոր-Ալավերդի ավտոճանապարհի 9-րդ կմ հատվածում բախվել են Լոռու մարզի բնակիչներ 87-ամյա Արտուշ Ա.-ի վարած «ՎԱԶ 2106» մակնիշի և 60-ամյա Կորյուն Մ.-ի վարած «Mercedes ML» մակնիշի ավտոմեքենաները:

Ինչպես հայտնում է ֆոտոլրագրող Գագիկ Շամշյանը, վթարի հետևանքով «06»-ի վարորդն ու նրա ուղևոր, ՌԴ քաղաքացի 63-ամյա Մարիետա Ա.-ն մարմնական վնասվածքներով տեղափոխվել են «Վանաձոր» բժշկական կենտրոն:

Դեպքի վայր են ժամանել ՀՀ ներքին գործերի նախարարության փրկարար ծառայության Լոռու մարզային փրկարարական վարչության հրշեջ-փրկարարական ջոկատից 1 մարտական հաշվարկ:

Ժամանել են նաև ՀՀ ՆԳՆ ոստիկանության Պարեկային ծառայության Լոռու մարզի գումարտակի 1-ին վաշտի 5-րդ դասակի պարեկները՝ գումարտակի հրամանատար Կարեն Կուրեղյանի, գումարտակի հրամանատարի տեղակալ Էդգար Պողոսյանի, դասակի հրամանատար Հրաչ Ամիրխանյանի գլխավորությամբ:

Տարածքը սահմանազատել են նույն վաշտի պարեկ Ստեփան Պլուզյանը, կրտսեր պարեկներ Անդրանիկ Էվոյանն ու Վահրամ Մուրադյանը:

Դեպքի վայր են ժամանել նաև ոստիկանության Գուգարքի բաժնի հերթապահ խումբը՝ օրվա պատասխանատու հերթապահի գլխավորությամբ:  

Վթարի մասին ոստիկանության Գուգարքի բաժնից տեղեկությունը փոխանցել են ՀՀ քննչական կոմիտեի Լոռու մարզային քննչական վարչություն, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ:

Վթարի փաստով քննչական վարչությունում նախաձեռնվել է քրեական վարույթ: