Առուշանյանի տեսակցությունների սահմանափակումը վերացնելու մասին միջնորդություն է ներկայացվել. դատական նիստը հետաձգվեց

Սյունիքի մարզի ընդհանուր իրավասության  դատարանում՝ նախագահությամբ դատավոր Գնել Գասպարյանի, այսօր՝ հոկտեմբերի 8-ին, մեկնարկել է Գորիսի համայնքապետ Առուշ Առուշանյանի եւ Քարահունջ բնակավայրի վարչական ղեկավար Լուսինե Ավետյանի գործով դատական նիստը։

Նշենք, որ Առուշանյանը մեղադրվում է ընտրակաշառք տալու մեջ, նա հուլիսի 16-ից կալանքի տակ է։ 

Նրա պաշտպան Էրիկ Ալեքսանյանը NEWS.am-ի հետ զրույցում ասաց, որ Առուշանյանի վերաբերյալ բոլոր քրեական գործերը միացվել են մեկ վարույթում։

Պաշտպաններն այսօր դատարանին միջնորդել են Առուշանյանի տեսակցությունների սահմանափակումը վերացնել։ Միջնորդության քննարկումը հետաձգվել ու նշանակվել է նոյեմբերի 5-ին։ Հաջորդ դատական նիստին գործով մեղադրող դատախազն իր դիրքորոշումը կհայտնի։

 Հիշեցնենք՝ ըստ ՀՔԾ հաղորդագրության՝ Սյունիքի մարզի Գորիս համայնքի ղեկավար, «Հայաստան» դաշինքի ընտրական ցուցակի 32-րդ համարը զբաղեցնող Ա.Ա.-ն, հիշյալ դաշինքի օգտին առավելագույն քվեներ ապահովելու եւ ընտրություններում ցանկալի արդյունք արձանագրելու անձնական եւ խմբային շահերից ելնելով` նախապատրաստել է ծանր հանցագործություն, այն է` երկու եւ ավելի ընտրողի կաշառք տալը:

Ըստ Առուշանյանի պաշտպանների՝ մեղադրանքի հիմքում Լուսինե Ավետյանի մեղադրական բնույթի ցուցմունքն է։ Հիշեցնենք, որ այս քրեական գործով սկզբում կալանավորված էր Ավետյանը, ինչպես պաշտպաններն են պնդում, նրա ցուցմունքից հետո որպես մեղադրյալ ներգրվեցին Առուշանյանին։ Առուշ Առուշանյանի՝ կալանքի տակ հայտնվելուց հետո Ավետյանն ազատ էր արձակվել։

Նշենք, որ Գորիսի քաղաքապետ Առուշ Առուշանյանը մասնակցում է ՏԻՄ ընտրություններին «Վերածնվող Հայաստան» եւ «Ազգային օրակարգ» կուսակցությունների կազմած դաշինքով. դաշինքը կրում է «Առուշ Առուշանյան» անունը։