Ինչո՞ւ Հայաստանում բանկերը չեն իրացնում 500 եվրոանոց թղթադրամը
ՏՆՏԵՍՈՒԹՅՈՒՆ
Հայաստանում բանկերը հրաժարվում են 500 եվրոանոց թղթադրամի իրացումից։ Նրանք հրաժարվում են այն մանրել, փոխանցել, ընդունել և այն ընդունում են միայն գումարի 1% գանձելու պահանջով։ 1or.am կայքը Կենտրոնական բանկից փորձեց տեղեկանալ, թե ի՞նչ հիմքով են բանկերը հրաժարվում իրացնել 500 եվրոանոց թղթադրամը։
Այն հարցմանը, թե ի՞նչ օրենքով է դա արվում և արդյոք կա՞ հատուկ կարգադրություն, թե բանկերը զբաղվում են ինքնագործունեությամբ ԿԲ-ից 1or.am կայքին պատասխանեցին, որ 2019 թվականից Եվրոպական կենտրոնական բանկը դադարեցրել է 500 եվրո անվանական արժեքով թղթադրամի տպագրությունը․ «Ի պատասխան Ձեր հարցման տեղեկացնում ենք, որ 2019 թվականից Եվրոպական կենտրոնական բանկը դադարեցրել է 500 եվրո անվանական արժեքով թղթադրամի տպագրությունը: Թղթադրամը շրջանառությունից դուրս է գալու բնական մաշվածության հետևանքով: Նշենք, որ համաձայն «Հայաստանի Հանրապետության կենտրոնական բանկի մասին» ՀՀ օրենքի 35-րդ հոդվածի 2-րդ մասի` Կենտրոնական բանկը չի կարող միջամտել բանկերի և իրենից լիցենզիա ստացած այլ անձանց ընթացիկ գործունեությանը՝ բացառությամբ օրենքով սահմանված դեպքերի: Կենտրոնական բանկի կողմից բանկերին և արտարժույթի փոխանակում իրականացնող այլ ֆինանասական կազմակերպություններին որևէ հանձանարարական չի տրվել 500 եվրո անվանական արժեքով թղթադրամ չփոխանակելու վերաբերյալ: Ըստ այդմ, բանկերը և մյուս ֆինանսական կազմակերպությունները ինքնուրույն են որոշում արտարժույթի առքուվաճառքի իրենց պայմանները՝ օրենսդրությանը և իրենց ներքին ընթացակարգերին համապատասխան»։
Սոնա Գիշյան
