Լողալը կարող է օգտակար լինել ուղեղի եւ հիշողության համար. հետազոտություն
ՀԱՍԱՐԱԿՈՒԹՅՈՒՆ
Մշտապես լողով զբաղվելը կարող է օգտակար լինել ուղեղի համար. լողալը, պարզվում է, նպաստում է գլխուղեղի կոգնիտիվ գործառույթի բարելավմանը, ինչպես նաեւ դրանում ձեւավորում է նոր նեյրոնային կապեր։ Այս մասին տեղեկացվում է Մարդի Հարդին-Բեյլոր համալսարանի նեյրոկենսաբանության դոցենտ Սինա Մեթյուի հոդվածում, որը հրապարակվել է The Conversation ամսագրում։
Մեթյուի խոսքով՝ լողալն ավելի օգտակար է ուղեղի համար, քան վազքը կամ հեծանվավազքը։ Իհարկե, ուղեղի վրա լողալու ազդեցությանը նվիրված հետազոտությունների մեծ մասը կատարվել է առնետների վրա, քանի որ այդ կրծողները զգալի գենետիկ եւ անատոմիական նմանություններ ունեն մարդկանց հետ։
Նման փորձարկումներից մեկի ժամանակ գիտնականները խոստովանել են, որ լողալը խթանում է որոշակի ուղեղային ուղիներ։ Դրանք կարող են կանխել հիպոկամպի բորբոքումը, ինչպես նաեւ խանգարել ապոպտոզին՝ բջիջների ծրագրվող մահվան պրոցեսին։ Լողալը նաեւ երկարացնում է նեյրոնների կյանքը եւ նվազեցնում ծերացման կոգնիտիվ հետեւանքները։
Հասկանալու համար, թե ինչպես է լողալն ազդում հիշողության վրա, մասնագետները առնետներին ստիպել են ամեն օր լողալ մեկ ժամվա ընթացքում, ինչից հետո դրանց տեղավորել են վեց ուղիներ ունեցող լաբիրինթոսում։ Դրանցից մեկում փակ պլատֆորմ կար, եւ կրծողներին տալիս էին վեց փորձ՝ այն գտնելու համար։
Մեկ շաբաթ հետո գիտնականները նկատեցին, որ առնետների կարճաժամկետ եւ երկարաժամկետ հիշողությունը բարելավվել է, քանի որ ավելի քիչ սխալներ էին գործում լաբիրինթոսն անցնելիս։ Մասնագետները ենթադրել են, որ լողալը կարելի է օգտագործել որպես մարդկանց մոտ նյարդահոգեկան խանգարումների պատճառով վնասված ուսուցման եւ հիշողության վերականգնման միջոց։
