Թուրքիան շանտաժի է ենթարկում Հայոց ցեղասպանությունը ճանաչած բուլղարական համայնքներին
ՖՈՏՈ
Բուլղարիայի երեք քաղաքներ Թուրքիայի եւ Բուլղարիայի միջեւ սահմանային համագործակցության ծրագրի շրջանակում ԵՄ-ից ֆինանսավորում չեն ստանա, քանի որ Թուրքիանs հրաժարվում է համագործակցել Հայոց ցեղասպանությունը ճանաչած քաղաքների իշխանությունների հետ: Այս մասին գրում է Euractiv.com-ը՝ վկայակոչելով Բուլղարիայի հանրային հեռուստատեսությունը:
Այսպիսով, Բուրգաս, Խասկովո եւ Սվիլենգրադ քաղաքները մի քանի միլիոն դոլար կկորցնեն, քանի որ չեն կարողանում թուրք գործընկեր գտնել: Նախագծերը վերաբերում են տարերային աղետների կանխմանն ու հետեւանքների մեղմացմանը: Խասկովոյի համար, որտեղ գետերը կամուրջներ եւ ջրապատնեշներ են քանդում եւ որտեղ մեծ թվով ջրհեղեղներ են գրանցվում, նախագծերի սառեցումն իսկական սկանդալ է:
Թուրքական Էդիրնեի քաղաքապետ Ռեջեփ Գյուրքանի խոսքով, որի հետ նախկինում համագործակցում էր բուլղարական Խասկովոն, Թուրքիայի ԱԳ նախարարությունից իրենց արգելել են շարունակել համագործակցությունը, երբ բուլղարական քաղաքում Հայոց ցեղասպանության պատվին զբոսայգի են անվանակոչել: Գյուրքանը Խասկովոյի իշխանություններին առաջարկել է եւս մեկ անգամ քվեարկել որոշման շուրջ եւ չեղյալ հայտարարել այն՝ համագործակցությունը վերականգնելու համար:
Խասկովոյի քաղաքապետ Դոբրի Բելիվանովն իր հերթին ընդգծել է, որ ոչ ոք իրավունք չունի միջամտել իրենց որոշումներին:
Ըստ Euractiv.com-ի, Բրյուսելը չի կարող որեւէ քայլ ձեռնարկել եւ կդադարեցնի ֆինանսավորումը, քանի որ այդպիսի նախագծերի համար հարեւան երկրից գործընկեր է անհրաժեշտ:
