Ռավեննայի փառատոնին Պետական կամերային երգչախումբը կկատարի Տիգրան Մանսուրյանի «Burgatorio» ստեղծագործությունը

Հայաստանի պետական կամերային երգչախումբը վերածննդի իտալացի մեծանուն բանաստեղծ և մտածող Դանթե Ալիգիերիի մահվան 700-րդ տարելիցի կապակցությամբ կմասնակցի Ռավեննայի հեղինակավոր փառատոնին՝ հանդես գալով Քերուբինիի նվագախմբի հետ:

Իտալիայում երգչախումբը կհնչեցնի Տիգրան Մանսուրյանի, Հայդնի, Մոցարտի, Շուբերտի ստեղծագործությունները։

Լրագրողները հունիսի 24-ին Կոմիտասի անվան կամերային երաժշտության տանը մասնակցեցին երգչախմբի փորձին և զրուցեցին երգչախմբի գեղարվեստական ղեկավար, գլխավոր դիրիժոր Ռոբերտ Մլքեյանի, տնօրեն Արմեն Արաբյանի և մաեստրո Տիգրան Մանսուրյանի հետ:

Ռոբերտ Մլքեյանի խոսքով՝ Ռավեննայի փառատոնը բարձրակարգ երաժշտական միջոցառում է: «Այնտեղ երգելու ենք մի խումբ դասականների ստեղծագործություններ, ինչպես նաև կատարելու ենք Տիգրան Մանսուրյանի «Burgatorio» գործը՝ նվիրված Դանթե Ալիգիերիի մահվան 700-րդ տարելիցին: Երգչախմբի, բարիտոն Գուրգեն Բավեյանի հետ աշխատելու և դիրիժորական վահանակի մոտ է լինելու աշխարհահռչակ դիրիժոր Ռիկարդո Մուտին»,-տեղեկացրեց Մլքեյանը:Ռավեննայում համերգը կկայանա հուլիսի 1-ին: Նույն համերգը վերոնշյալ կազմով տեղի կունենա հուլիսի 4-ին Երևանի օպերային թատրոնում, և Հայաստանում առաջին անգամ կհնչի Մանսուրյանի ստեղծագործությունը:

Մլքեյանն իրադարձությունը նշանակալի և կարևոր է համարում: Ըստ նրա՝ փառատոնին մասնակցությունը լուրջ համագործակցություն է Իտալիայի հետ, ինչը նպաստում է մշակութային փոխհարաբերություննների զարգացմանը:

Սիրված կոմպոզիտոր Տիգրան Մանսուրյանը, անդրադառնալով Դանտեին, հիշեցրեց, որ մեծագույն մտածողի, պոետի գործը՝ «Աստվածային կատակերգությունը», երեք մասից է բաղկացած՝ «Դրախտ», «Քավարան», «Դժոխք»: Ռավեննայի փառատոնի ղեկավարությունն ընտրել է երեք հեղինակի, որոնցից յուրաքանչյուրը ստեղծագործության մասերից մեկի հիման վրա երաժշտություն է գրել: «Ինձ առաջարկեցին «Քավարան» մասը: «Burgatorio» գործը պետք է առաջին անգամ հնչի Երևանում: Այդ ուղղությամբ մեծ աշխատանք է տարել պարոն Մասոտին, որի հետ լավ բարեկամներ ենք, աշխատաքի կայացման գործում մեծապես օգնել է Մինաս Լուրյանը, որն Իտալիայում ղեկավարում է հայ մշակութային կենտրոններից մեկը:

Կարևոր էր մաեստրո Մուտիի ցանկությունը այդ գործը հնչեցնելու թե՛ Երևանում, թե՛ Իտալիայում»,-շեշտեց մաեստրոն:

Մանսուրյանը պատմեց, որ ստեղծագործությունն ի սկզբանե գրվել է սիմֆոնիկ նվագախմբի մեծ կազմի և երգչախմբի համար, սակայն համավարակի պատճառով պահանջվել է փոքրացնել նվագախմբի կազմը: Մանսուրյանը պահպանել է առաջնային տարբերակը՝ մտածելով, որ գուցե մի օր այն կատարի որևէ մեծ նվագախումբ, սակայն գրել է նաև նվագախմբի փոքր կազմի համար:

Կոմպոզիտորը խոստովանեց, որ իտալերեն տեքստի հետ կապված խնդիրներ եղել են. իրեն օգնել է իտալերենի մասնագետ Գրիգոր Ղազարյանը: Նա հստակեցրել է ոչ միայն բառի իմաստը, նրբերանգները, այլև շեշտադրությունը:

Խոսելով երգչախմբի մասին՝ Տիգրան Մանսուրյանն ասաց, որ մշտապես համագործակցում են. հանդես են եկել Իտալիայում, աշխարհի տարբեր երկրներում, ձայնագրվել են նշանավոր ընկերություններում, համատեղ ջանքերով կյանքի են կոչել «Արս պոետիկա» խմբերգային մեծածավալ գործը: «Ռավեննայի փառատոնին մասնակցությամբ երգչախումբը հնարավորություն է ստանում երգելու Ռիկարդո Մուտիի՝ մեծագույն վարպետի ղեկավարությամբ և իտալական նվագախմբի նվագակցությամբ, ինչը շատ կարևոր է»,- եզրափակեց մաեստրոն:

Արմեն Արաբյանն էլ հարկ համարեց շեշտել, որ իտալական կողմն իր վրա է վերցրել երգչախմբի՝ փառատոնին մասնակցելու բոլոր ծախսերը: