Հայաստանյան ընտրությունների վերաբերյալ միջազգային արձագանքները
ՔԱՂԱՔԱԿԱՆՈՒԹՅՈՒՆ
Հետընտրական առաջին օրը հայաստանյան ընտրությունները բուռն արձագանքի են արժանացել միջազգային մամուլի և կազմակերպությունների կողմից։ Քվեարկության արդյունքների վերջնական հրապարակումից անմիջապես հետո ընտրությունների մասին կարծիք են հայտնել ԱՊՀ դիտորդական առաքելություն իրականացնող կազմակերպությունը, արձանագրելով, որ խախտում չի գրանցվել․ «Ընտրությանը սահմանադրական կարգի և օրենքի խախտում չի գրանցվել»։
Բրիտանական BBC-ն անդրադառնալով ընտրությունների ելքին գրել է․ «Հայաստանում ընտրությունների նախնական արդյունքների համաձայն «Քաղաքացիական պայմանագիր» կուսակցությունը հավաքել է ձայների 58%-ը: Մինչդեռ նրա հիմնական հակառակորդ, նախկին նախագահ Ռոբերտ Քոչարյանը պնդում է, թե ընտրությունները կեղծված են: Հիշեցնենք որ Ռոբերտ Քոչարյանը՝ Ռուսաստանի նախագահ Վլադիմիր Պուտինի ընկերն ու դաշնակիցն է և ինքն էլ նախկինում մեղադրվել է նախագահական ընտրությունները կեղծելու մեջ, որին հաջորդել են 2008թ. մարտի 1-ի ողբերգական իրադարձությունները»:
ԵԱՀԿ դիտորդական առաքելություն իրականացնող կազմակերպությունն էլ հայաստանյան ընտրությունները որակել է մրցակցային․ «Հայաստանում ընտրությունները եղել են մրցակցային, պահվել են մարդու հիմնարար ընտրական իրավունքը»։
Բրիտանական The Guardian-ը գրում է, որ ընտրապայքարն իրականում հիշեցնում էր երկու ձիով մրցավազք: Թերթը հիշեցնում է, որ բևեռացնող հռետորաբանությամբ աչքի ընկած քարոզարշավի ժամանակ Փաշինյանը հայտարարել է, որ իր կուսակցությանն անհրաժեշտ է ձայների 60%-ը: Ինքը՝ Քոչարյանը, նախկինում մեղադրվել է իր՝ ջանասիրաբար ընտրված դաշնակցի օգտին ընտրությունները կեղծելու և 2008թ. ցուցարարների բողոքի ակցիան ցրելու մեջ, որը արդյունքում եղել են քաղաքացիական բախումներ և զոհեր: Ըստ The Guardian-ի՝ 2018թ. Հայաստանը միջազգային գովասանքի է արժանացել իր առաջին ազատ և արդար ընտրություններն անցկացնելու համար:
Reuters-ը, վկայակոչելով ԿԸՀ նախնական արդյունքները, հիշեցնում է, որ Արցախյան պատերազմում պարտությունից հետո արտահերթ խորհրդարանական ընտրությունները միտված էին վերջ դնելու Հայաստանում ստեղծված քաղաքական ճգնաժամին: Պարբերականը վստահ է, որ փողոցային պայքարի արդյունքում իշխանության եկած Փաշինյանը ավելի սառը հարաբերություններ ունի Կրեմլի հետ: Նաև հիշեցնում է, որ Քոչարյանը Հայաստանում նախագահել է 1998-2008թթ. և մեղադրվում է հակասահմանադրական գործունեության մեջ, քանի որ 2008թ. վիճելի ընտրություններից հետո հայտարարեց արտակարգ դրություն, որից հետո ոստիկանության և ցուցարարների միջև բախումների արդյունքում 10 քաղաքացիական անձ մահացավ:
РИА новости ռուսական պարբերականն էլ գրել է․ «Կրեմլը տեսնում է Հայաստանի խորհրդարանական ընտրություններում Փաշինյանի կուսակցության համոզիչ հաղթանակը, շնորհավորում ենք հայ ժողովրդին ընտրության կապակցությամբ»։
Ռուսաստանի նախագահի մամուլի քարտուղար Դմիտրի Պեսկովը ևս անդրադարձել է ընտրությունների արդյունքներին․ «Մենք տեսնում ենք, որ համոզիչ հաղթանակ է տարել վարչապետ Նիկոլ Փաշինյանի կուսակցությունը։ Մենք շնորհավորում ենք հայ ժողովրդին ընտրության կապակցությամբ», - նշել է Պեսկովը՝ հավելելով, որ Հայաստանը Ռուսաստանի ամենամոտ դաշնակիցն ու գործընկերն է։ «Իհարկե, մենք ցանկանում ենք, որ հայ ժողովրդին այդ ընտրությունը օգնի հաղթահարել դժվարությունները, այդ թվում և եռակողմ պայմանավորվածությունների իրականացման ճանապարհով, որոնք ձեռք են բերվել և ստորագրվել Ռուսաստանի նախագահ Վլադիմիր Պուտինի անմիջական մասնակցությամբ», հավելել է Պեսկովը:
Սոնա Գիշյան
