ԱՄՆ-ն զորքերը դուրս է բերում Մերձավոր Արևելքից․ Իրանն այլևս գլխավոր հակառակորդը չէ
ՄԻՋԱԶԳԱՅԻՆ
Սպիտակ տունը սկսել է ամերիկյան ուժերն ու սպառազինությունները դուրս բերել Մերձավոր Արևելքի մի շարք երկրներից։ Տեղեկությունը հայտնում է «Wall Street Journal»–ը։
Ինչպես հայտնի է դարձել պարբերականին, ԱՄՆ-ը վերատեղակայում է «Patriot» զենիթահրթիռային համալիրների մոտ ութ մարտկոց, այդ թվում՝ Իրաքից, Քուվեյթից, Հորդանանից և Սաուդյան Արաբիայից: Աղբյուրները հայտնում են, որ ԱՄՆ-ն Սաուդյան Արաբիայից դուրս է բերում նաև THAAD համակարգը և կրճատում կործանիչների թիվը տարածաշրջանում:
Ըստ պարբերականի՝ տեխնիկան դուրս բերելու պատճառն այն է, որ ԱՄՆ–ն վերադառնում է տարածաշրջանային ներկայության ավելի ավանդական մակարդակին, այն դեպքում, երբ նախկին վարչակազմը տեխնիկան Մերձավոր Արևելք էր տեղափոխում Իրանի վրա ճնշում գործադրելու համար։ Պաշտոնյաները կարծում են, որ ամերիկյան սպառազինությունը Իրանին հետ չպահեց ապակայունացնող գործողություններից։
ԱՄՆ-ի նոր վարչակազմը նախատեսում է տեղափոխել ռազմական ինքնաթիռների մի մասը և հարյուրավոր ամերիկացի զինվորականների, որոնք սպասարկում են նշված սպառազինությունները: Հայտնի է նաև, որ ԱՄՆ նախագահ Ջո Բայդենը որոշել է կրճատել տարածաշրջանում ամերիկյան հակահրթիռային համակարգերի թիվը, քանի որ զինված ուժերն ուղղում է Չինաստանի և Ռուսաստանի մարտահրավերների դիմակայմանը:
Մեկնաբանելով այս նորությունն իր Telegram-ալիքում՝ ռուսաստանցի քաղաքագետ Եվգենի Սատանովսկին ենթադրում է, որ Ամերիկայի այդ գործողությունները Թեհրանին ընդառաջելու բացահայտ քայլեր են։
Քաղաքագետը հարց է բարձրացնում, թե ամերիկացիների կողմից արտահանվող տեխնիկան ուր կգնա։
«Ասիա՞, Չինաստանի դե՞մ։ Դեպի Եվրոպա՞: Այստեղ արդեն մենք պետք է լարվենք, քանի որ «ռազմավարական կայունության» մասին խոսակցությունները լավ բան են, բայց՝ զուտ տեսական»,-գրում է Սատանովսկին։
Ավելի վաղ հաղորդվել էր, որ ԱՄՆ-ն զորքերի մեկ երրորդը դուրս է բերել Աֆղանստանից։ Այդ երկրից դուրս են բերել մոտ 300 բեռնատար ինքնաթիռ՝ նյութերով։ Դրա հետ մեկտեղ 13 հազար միավոր սարքավորումներ փոխանցվել են պաշտպանության նախարարության նյութատեխնիկական ապահովման գործակալությանը` օգտահանման համար:
