Բոլորն առանց բացառության մեղավոր են կատարվածի համար
ՔԱՂԱՔԱԿԱՆՈՒԹՅՈՒՆ
Օրերս համացանցում լուսանկարներ ու տեսանյութ տարածվեցին, որոնցում Արցախյան պատերազմում զոհված զինծառայողների մասունքներն էին պոլիէթիլենային տոպրակներով՝ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղի նկուղի հատակում, անխնամ թափված: Լուսանկարների տարածումից ու հանրային մեծ աղմուկից հետո առողջապահության նախարարի պաշտոնակատար Անահիտ Ավանեսյանը ներողություն խնդրեց, իսկ հետո հայտարարվեց, որ «Դատաբժշկական գիտագործնական կենտրոն» ՊՈԱԿ-ի Աբովյանի մասնաճյուղի վարիչը և այս գործընթացում ընդգրկված 2 աշխատակից ազատվել են աշխատանքից: ՊՈԱԿ-ի տնօրենը ստացել է խիստ նկատողություն:
Այս թեմայով զրուցել ենք փաստաբան Գարիկ Գալիկյանի հետ։
Հարցին, թե ով է կատարվածի հիմնական պատասխանատուն փաստաբանը պատասխանել է․ «Բոլորն էլ մեղավոր են, ես չեմ ուզում ամբողջ բեռը բարդել նախարարի վրա, որովհետև մեկ անձը չի կարող հսկողություն իրականացնել բոլոր տեղերում: Կարծում եմ՝ տեղի մարդիկ պետք է մի քիչ նորմալ վերաբերվեին, և եթե կար խնդիր՝ բարձրաձայնեին, իսկ եթե իրենք որևէ մեկի հրամանն են կատարել… Էլի եմ ասում, բոլորն առանց բացառության մեղավոր են կատարվածի համար՝ ինձանից, ձեզանից սկսած, բայց կոնկրետ ո՞վ է մեղավոր, ո՞ւմ մեղադրանք կառաջադրվի կամ չի առաջադրվի, քննությունը ցույց կտա: Այս պահին ես ավել բան չեմ կարող ասել, որ նախաքննող մարմնին չկաշկանդեմ: Եթե զգանք, որ այն ճիշտ չի աշխատում, օբյեկտիվորեն չի մոտենում խնդրին, այն ժամանակ մենք ինքներս կբարձրաձայնենք մանրամասները»:
Սոնա Գիշյան
