Ադրբեջանցիներն առանց որևէ արգելքի անցուդարձ են անում հայկական զինուժի հսկողության տակ գտնվող ճանապարհներով. ԱՀ պատգամավորը ահազանգում է

Մայիսի 12-ին թշնամին խախտելով հայ-ադրբեջանական սահմանը՝ մի քանի կիլոմետր Սյունիքի, Գեղարքունիքի մարզերի հատվածներում առաջ է եկել, մինչ օրս նրանք առաջ եկած հատվածներում են և հետ չեն գնում։ Սյունիքում մի քանի անգամ անցկացվել են բանակցություններ, որպեսզի թշնամին հետ գնա, սակայն ապարդյուն։ Հարակից գյուղերի ղեկավարներն ու բնակիչներն ասում են, որ թշնամու զինվորներն ինչ-որ քարտեզներով են առաջ եկել և պնդում են, թե վերադասից հրաման են ստացել, որ առաջ գան, քանի որ համարում են, որ այդ տարածքներն ադրբեջանական են։

ՀՀ-ում առկա իրավիճակի եւ դրա ուղիղ ազդեցությանը Արցախի վրա հարցերի պատասխանը փորձել ենք ստանալ ԱՀ «Արդարություն» խմբակցության պատգամավոր ՄԵՏԱՔՍԵ ՀԱԿՈԲՅԱՆԻՑ, ով նախ փաստեց.

-Հայաստանում տեղի ունեցող իրադարձությունները, մասնավորապես՝ հայ-ադրբեջանական սահմանի վիճակը, անմիջապես ազդում են Արցախի վրա։ Արցախում մարդիկ իրենց խնդիրները թողած, շունչները պահած՝ հետևում են Սյունիքի իրադարձություններին և անհրաժեշտության դեպքում աջակցություն կցուցաբերեն։

Պետք է ասեմ, որ Արցախցին ՀՀ-ում տիրող իրավիճակից ավելի է լարվում` գիտակցելով, որ եթե  թշնամին որևէ բանի առջև կանգ չառնելով՝ մտնում է ՀՀ պետական տարածք, ապա որևէ խնդիր չի ունենա գործողություններ իրականացնելու Արցախում, այստեղ միակ արգելքը ռուս խաղաղապահներն են, որոնք իրենց աշխատանքը կատարում են այնպես, ինչպես պետք է կատարեն:

Մեզ համար առնվազ տարօրինակ է թշնամու հետ բանակցելը, ինչի շուրջ են բանակցում, կարելի է բանակցել միայն գերիների շուրջ: Առհասարակ այս պարտված, կապիտուլյացիա ստորագրած իշխանությունների հետ ոչ մեկ չի բանակցում, նրանց առնվազն կարող են թելադրել, նրանք էլ սուս-փուս կատարեն:

-Տիկին Հակոբյան, ի՞նչ իրավիճակ է Արցախում, վերջին շրջանում բավականին անհանգստացնող միջադեպերի մասին ենք խոսում:

-Նոյեմբերի 9-ից սկսած ադրբեջանցիներն առանց որևէ արգելքի անցուդարձ են անում հայկական զինուժի հսկողության տակ գտնվող ճանապարհներով, ինչը բավականին երկար ճանապարհ է․ այն սկսվում է  Քարվաճառով, գնում է Դրմբոնով, այնուհետև՝ Կարմիր Շուկա՝ մինչև Շուշի։ Այդ ճանապարհներով անցնող բեռնատարների քանակն այնքան շատ է, որ տեսանելի են նաև Ստեփանակերտից, ճանապարհն անցնում է Ստեփանակերտի վերևով։

Թշնամու կողմից առաջ չգալու միակ երաշխքիը ռուս խաղաղապահների ներկայությունն է Արցախում, չնայած թշնամին միշտ էլ դիմելու է սադրանքների, և անվտանգության առումով արցախցին ապահովագրված չէ, թեկուզ այն առումով, որ  թշնամու նպատակը բնակչության շրջանում խուճապ առաջացնելն է ու Արցախը հայաթափելը։

Զրույցը` ԻԼՈՆԱ ԱԶԱՐՅԱՆԻ