Ռուս վիրուսոլոգը նշել է COVID-19-ի նկատմամբ հակամարմինների պահպանման ժամկետները նորածինների մոտ
ՀԱՍԱՐԱԿՈՒԹՅՈՒՆ
lenta.ru-ն գրում է, որ COVID-19–ի հակամարմինները, որոնք մորից ստանում են նորածինները, մնում են նորածնի օրգանիզմում մոտ 2-3 ամիս, որից հետո անհետանում են: Նման ժամկետներ է նշել ռուս վիրուսաբան, Մոսկվայի նախկին գլխավոր վարակաբան Նիկոլայ Մալիշևը: Մասնագետի խոսքով` պետք են նմանատիպ ավելի շատ դեպքեր, որ իրականացվի խնդրի ամբողջական ուսումնասիրությունը: Մալիշևը հիշել է, որ Ռուսաստանում հղի կանայք դեռ չեն պատվաստվում կորոնավիրուսի դեմ և չի կարելի գուշակել, թե ինչպես կարձագանքի նորածնի օրգանիզմը մոր կողմից «Սպուտնիկ V»-ով պատվաստմանը: Մեկնաբանելով այն տեղեկությունները, որ ամերիկյան Ֆլորիդա նահանգում առողջապահական աշխատողը պատվաստանյութի առաջին չափաբաժնից հետո երեխա է ունեցել կորոնավիրուսային հակամարմիններով, Մալիշևը հորդորել է հապճեպ եզրակացություններ չանել:
Ըստ նրա` անհրաժեշտ է տեսնել, թե արդյո՞ք հակամարմինները փոխանցվել են մորից, թե դրանք արդեն զարգացել են հենց երեխայի մոտ:
«Ես հակված եմ առաջին տարբերակին: Այլ հիվանդությունների դեմ պատվաստումների նմանատիպ նախադեպեր նկարագրվել են բազմաթիվ անգամներ», - եզրափակել է նա:
Ավելի վաղ, ինֆեկցիոնիստ Սերգեյ Վոզնեսենսկին ասել էր, որ հղիության ընթացքում ապաքինված կանայք կարող են ունենալ կորոնավիրուսի հակամարմիններով երեխաներ: Ըստ նրա` բարձր տիտրով հակամարմինների հավանականությունը գնահատվում է ավելի քան 50 տոկոս: Գնահատելով Ֆլորիդայից ստացված զեկույցները` Վոզնեսենսկին նշել է, որ իրավիճակն ամբողջությամբ պարզ չէ, քանի որ հղիությունը հակացուցում է պատվաստումների իրականացման համար:
