Երևանն ու Մոսկվան վախենում են, որ հայկական ընտրությունները կանցնեն կոշտ սցենարով
ՔԱՂԱՔԱԿԱՆՈՒԹՅՈՒՆ
akcent.site-ն գրում է, որ Հայաստանի Ազգային ժողովի արտահերթ ընտրությունների նախապատրաստական աշխատանքներն ավելի ու ավելի շատ են նմանվում քաղաքական շոուի: Ընտրողներին վախեցնում են սպասվող «արտաքին միջամտությամբ» և «արյունոտ ընդդիմությամբ»:
Վարչապետ Նիկոլ Փաշինյանը Արագածոտնի մարզում իր կողմնակիցների հետ հանդիպմանը ասել է, որ ոչ համակարգային ընդդիմության մի մասը «արյունով չի հագեցել ... տենչում է նոր արյունահեղության և չի ուզում ընտրություններ»:
Իսկ ահա ՀԱՊԿ-ը հայտարարել է Հայաստանի գործերին «արտաքին միջամտության» սպառնալիքի մասին: Վախերը, այնուամենայնիվ, այդքան էլ անհիմն չեն: Մարտի 16-ին Երևանում կայացած «Սասնա ծռեր» ազգայնական շարժման երկու հազարանոց հանրահավաքին ծածանվել են Հայաստանի դրոշները ... և Միացյալ Նահանգների աստղերն ու շերտերը: Դա խորհրդանշական է: Թուրքիան նույնպես զգոն է և անսովոր համարձակությամբ մեկնաբանում է Հայաստանի ներքին գործերը: Թուրքիայի արտգործնախարարությունը և իշխող «Արդարություն և զարգացում» կուսակցությունը նախագահ Ռեջեփ Էրդողանի գլխավորությամբ վերջին շաբաթների ընթացքում երկու անգամ բացահայտ աջակցել է վարչապետ Նիկոլ Փաշինյանին: Սկզբում Անկարան խստորեն դատապարտել է փետրվարի 25-ին հայ զինվորականների ձեռնարկած «պետական հեղաշրջման փորձը», ապա ճիշտ է համարել արտահերթ ընտրություններ նշանակելու Փաշինյանի որոշումը: Այնպես որ, հաստատապես, Թուրքիան ընտրարշավի նկատմամբ անտարբեր չի մնա: Միակ հարցն այն է, թե ու՞մ վրա է խաղադրույքը կատարելու:
Ընդդիմության որոշ առաջնորդներ, մասնավորապես, նախկին նախագահ Ռոբերտ Քոչարյանն արդեն հայտարարել են Ազգային ժողովի արտահերթ ընտրություններին մասնակցելու պատրաստակամության մասին: Միևնույն ժամանակ, «Հայրենիքի փրկության շարժման» առաջնորդ Վազգեն Մանուկյանը և «Հայ ազգային կոնգրեսի» նախկին նախագահ Լևոն Տեր-Պետրոսյանը հրաժարվել են մասնակցել քարոզարշավին: Դաշնակցության ազգայնական կուսակցության մասնակցությունը դեռ կասկածի տակ է:
Նյութը հրապարակման պատրաստեց Կամո Խաչիկյանը
