Հանգստությունը, որով իշխանությունները քննարկում են Հայաստանի համար նշանակություն չունեցող օրենքներ, վկայում է, որ իրենք չեն գիտակցում՝ ինչ է տեղի ունեցել․ Էլինար Վարդանյան (տեսանյութ)
ՔԱՂԱՔԱԿԱՆՈՒԹՅՈՒՆԻշխանությունները որևէ կերպ չեն ուզում ընդունել պատերազմում խայտառակ պարտության պատասխանատվությունը և մեղավորությունը և ամեն կերպ ցանկանում են պահպանել իրենց աթոռը, հետևապես այս ընտրությունները նաև դրա համար են իրենց ձեռնատու, որովհետև հակառակ դեպում՝ կա մտավախություն, որ իրենք արդարացիորեն պետք է ենթարկվեն պատասխանատվության այն ամենի համար ինչ արել են այս երկրին։ Այս մասին AD TV «Հարցազրույց» հաղորդման ընթացքում ասաց «Այլընտրանքային նախագծեր» խմբի անդամ Էլինար Վարդանյանը:
Անդրադառնալով ընտրությունների նշանակությանը՝ նա նշեց, որ եթե ընտրությունները իսկապես տեղի ունենան առանց կեղծիքների, առանց վարչական լծակների օգտագործման՝ հնարավոր է դրանք ինչ-որ բան փոխեն։ «Բայց հաշվի առնելով այն հանգամանքը, որ մենք տեսանք՝ ակնհայտ է, որ այս իշխանությունը կեղծիքի մարմնավորում է, որքան էլ փորձեն ցույց տալ, որ մենք նախորդներից տարբերվում ենք՝ այդուհանդերձ, թեև նրանք պնդում են, որ հրաժարվում են նախկինների թույլ տված բոլոր սխալներից, միևնույն է՝ քայլ -քայլ կրկնում ու խորացնում են այն բոլոր սխալները, որ թույլ են տվել նախկինները։ Մարտի 1-յան հանրահավաքը բավարար է որպեսզի մենք ունենաք վստահություն, որ վարչական ռեսուրսը օգտագործվելու է»։
