Ադրբեջանցիները դիրքավորվել ու օդանավակայանի մոտ վրաններ են տեղադրել. Կապանի քաղաքապետ
ՀԱՍԱՐԱԿՈՒԹՅՈՒՆ
Դեռ հայտնի չէ, թե ինչպես է հետագայում կարգավորվելու օդանավակայանի շահագործման հարցն ու ինչպես է ապահովվելու անվտանգության խնդիրը։
Սյունիքի մարզի Կապան համայնքի հատվածում սահմանազատման աշխատանքներ դեռևս չեն եղել։ Sputnik Արմենիայի հետ զրույցում տեղեկությունը հայտնեց Կապան համայքնի ղեկավար Գևորգ Փարսյանը։
«Որպես այդպիսին` սահմանազատում չի եղել։ Այն, ինչ հիմա կա, դա վերջնական չէ։ Ինչպես գիտեք` սահմանազատումը երկարատև պրոցես »,- ասաց Փարսյանը։
Ինչ վերաբերում է այն հարցին, թե այդ դեպքում ի՞նչ հիմքով են ադրբեջանցիները դիրքավորվում քաղաքին մոտ, Փարսյանը նշեց՝ «նույն մոտեցումով, ինչ-որ մնացած տեղերում»։
Նա տեղեկացրեց, որ ադրբեջանցիները դիրքավորվել են Կապանի օդանավակայանին շատ մոտ, արդեն վրաններ էլ են տեղադրել։
«Ներկա դրությամբ օդանավակայանը գտնվում է ադրբեջանցիների դիտարկման ներքո»,- ասաց քաղաքապետը։
Նրա խոսքով՝ այս պահին դեռ հայտնի չէ, թե ինչպես է հետագայում կարգավորվելու օդանավակայանի շահագործման հարցն ու ինչպես է ապահովվելու անվտանգությունը։
Ինչ վերաբերում է միջհամայնքային ճանապարհների անվտանգությանը, համայնքի ղեկավարի խոսքով՝ խնդիր չկա, որևիցե արտառոց դեպք մինչ այս պահը չի գրանցվել։ Կրակոցներ ևս չեն լսվել։
Չնայած դրան՝ բնակիչների տրամադրությունն ու հոգեվիճակը համայնքի ղեկավարը նկարագրեց որպես «հարաբերական անհանգիստ»։
