Պատերազմական շրջանում կատարված հարցումների արդյունքները բավական խոսուն են
ՔԱՂԱՔԱԿԱՆՈՒԹՅՈՒՆ
«Գելափ ինթերնեյշնլ» ասոցիացիայի հայաստանյան ներկայացուցչությունը շարունակում է «Սեղմված զսպանակ» նախագծի շրջանակներում իրականացնել սոցիոլոգիական հետազոտություններ, որոնք ամփոփում են պատերազմական իրավիճակի հանդեպ հասարակության գնահատականները և մոտեցումները: Կազմակերպության տնօրեն Արամ Նավասարդյանի տեղեկացմամբ՝ իրականացված երրորդ փուլի հարցաշարում ներառված հարցերի շարքում եղել է նաև Վազգեն Մանուկյանի՝ իշխանությունը բանակին հանձնելու մասին հայտարարությունը: Հարցման արդյունքերի համաձայն՝ պարզվել է, որ հարցվածների 8,5 %-ը Մանուկյանի կոչին լիովին համաձայն է եղել, ավելի շուտ համաձայն է եղել հարցվածների 5,7 %-ը, ավելի շուտ համաձայն չի եղել հարցվածների 15, 7 %-ը, իսկ ընդհանրապես համաձայն չի եղել՝ 57,6 %-ը:
Ուշագրավ է նաև, որ հարցման երեք փուլերի համեմատությունը ցույց է տվել, որ փոփոխության են ենթարկվել Արցախի դեմ պատերազմ հրահրող պետությունների հարցման արդյունքները: Եթե հարցման առաջին փուլի ժամանակ հարցվածների 83 %-ի կարծիքով որպես պատերազմ հրահրող երկիր նշվել է Թուրքիան, ապա երկորդ փուլում այն կազմել է 89 %, իսկ երրորդ փուլի ժամանակ 92 %-ն է համոզված պնդել, որ պատերազմը հրահրվել է Թուրքիայի կողմից:
Ինչ վերաբերում է Ադրբեջանին, ապա հարցման առաջին փուլի ժամանակ հարցվածների 20 %-ի կարծիքով պատերազմի հրահրողը եղել է Ադրբեջանը, երկրորդ փուլում այն կազմել է 40%, իսկ երրրորդ փուլի արդյունքներով Ադրբեջանը որպես հրահրող երկիր է դիտարկել հարցվածների 31, 4%-ը: Ոշագրավ է նաև, որ աճել է նաև Իսրայելին, որպես պատերազմ հրահրող երկիր համարող քաղաքացիների թիվը: Եթե առաջին և երկրորդ փուլերի ժամանակ Իսրայելը որպես հրահրող երկիր է համարել հարցվածների 1-2 %-ը, ապա երրորդ փուլի արդյունքներով այդ ցուցանիշը հասել է 8 %-ի:
Արմինե Գրիգորյան
