Ռուսաստանը վաղ, թե՝ ուշ ավելի լուրջ կարձագանքի այս խնդրին. Ռուբեն Սաֆրաստյան
ՔԱՂԱՔԱԿԱՆՈՒԹՅՈՒՆ
Չնայած, որ բազմաթիվ ապացույցներ կան, որ թուրքական զորքը ներգրավված է արցախյան պատերազմում, բայց Թուրքիան արդեն երկրորդ անգամ է հայտարարում, որ եթե Ադրբեջանի նախագահը դիմի Թուրքիային, ապա վերջինը պատրաստ է զորք տրամադրել։ Ակադեմիկոս, թուրքագետ Ռուբեն Սաֆրաստյանի կարծիքով՝ այս հայտարարության հիմնական նպատակը Ալիևին հույս տալն է, որ Թուրքիան կանգնած է իր մեջքին։ Հաջորդը՝ դրանով Էրդողանը Ալիևին բանակցություններից զերծ պահելու նպատակ է հետապնդում։
1or.am-ի հետ զրույցում թուրքագետը նշեց նաև, որ, բացի վերը թվարկածներից, այս քայլը Թուրքիայի կողմից իրավիճակն է՛լ ավելի սրելու և Ադրբեջանին պատերազմը շարունակելուն մղելու նպատակ է հետապնդում։
«Թուրքիան արդեն իսկ ներգրավված է պատերազմի մեջ՝ պլանավորման, կառավարման, վարձկաններ մատակարարելու մակարդակներում: Այդ ամենի մասին բարձրաձայնում է նաև միջազգային մամուլը: Եվ այդ պարագայում կրկին հայտարարել, թե կարող է զորք ուղարկել Ադրբեջան՝ խոսում է Թուրքիայի լկտի պահվածքի մասին: Բացի այդ, փորձում են մեկ անգամ ևս հաստատել, որ Թուրքիան Հարավային Կովկասում արդեն լիիրավ խաղացող է: Այս մեսիջն, անշուշտ, ուղղված է Ռուսաստանին, քանի որ Թուրքիային ոչ թե Արցախն է պետք, այլ՝ Հարավային Կովկասը»,- ասաց Ռ. Սաֆրաստյանը։
Խոսելով ռուս-թուրքական հակասությունների մասին` թուրքագետը նշեց, որ եթե Թուրքիան ցանկանում է Հարավային Կովկասն ամբողջությամբ դարձնել իր ազդեցության ոլորտ, ապա Ռուսաստանին մինչ այս հաջողվել է պահպանել իր ազդեցության մի մասը: Եվ բնական է, որ այս առումով երկու պետությունների միջև կան ռազմավարական լուրջ հակասություններ:
«Բացի այդ, հակասություններ կան ահաբեկիչների առումով, քանի որ հայտնի է, որ նրանց Թուրքիան ներմուծեց Ադրբեջան, որպեսզի վարձկան ջիհադիստները կռվեն հայերի դեմ: Հայտնի է նաև, որ նրանց կարելի է հանդիպել նաև Հարավային Կովկասի այլ շրջաններում ևս: Եվ բնական է, որ ջիհադիստները մեծագույն վտանգ են ներկայացնում ոչ միայն հայ ժողովրդի, այլև՝ Ռուսաստանի համար, ինչը լուրջ խնդիր է: Ես հույս ունեմ, որ Ռուսաստանը վաղ, թե՝ ուշ ավելի լուրջ կարձագանքի այս խնդրին»,- ասաց Ռ. Սաֆրաստյանը։
Արմինե Գրիգորյան
