Սա ադրբեջանական բանակին վերջնականապես կապիտուլյացիայի ենթարկելու հերթական հնարավորությունն է. Գրիշա Սարգսյան
ՔԱՂԱՔԱԿԱՆՈՒԹՅՈՒՆ
Այս պահին Ոստիկանության հատուկ նշանակության ջոկատի վետերանների գրասենյակում, որը գտնվում է Մոսկովյան 5 հասցեում տարբեր ուղղություններով գործընթացներ են իրականացվում: Գրասենյակ են դիմում զինվորագրվել ցանկացողներ, բարեգործության նպատակով խմբին միացող մեր հայրենակիցներ և այլն: Կամավորներից Խաչիկ Կիրակոսյանը, որը սպասում էր զինվորագրման իր հերթին, նշեց, որ 90-ական թվականներից են իրենք սպասել այսօրվան: Հիմա եկել է ժամանակը, որ իրենք էլ մասնակցեն այս պարտադրված պատերազմին: Փոխգնդապետ Համլետ Մինասյանը, նշեց, որ իրենք ասելու ոչինչ չունեն: Սպասում են, որ մեկնեն առաջնագիծ և այնտեղ իրենց ասելիքը գործով ցույց տան: Ոստիկանության հատուկ նշանակության ջոկատի ներկայացուցիչ, գնդապետ Գրիշա Սարգսյանի խոսքով՝ հերթական անգամ հնարավորություն է ընձեռվել Հայաստանի Հանրապետությանը, որպեսզի վերջնականապես կապիտուլյացիայի ենթարկեն ադրբեջանական բանակին:
«Մենք հզոր ենք եղել, կանք ու կմնանք: Այսօր առիթ է ստեղծվել, որ Հայաստնի Ազգային ժողովը ճանաչի Արցախի անկախությունը: Պետք է կարողանանք վերջակետ դնել այս պատերազմի և Ադրբեջանի նկրտումների վրա:1994 թվականին Հայաստանի իշխանությունները ոչ թե պետք է զինադադարի պայմանագիր ստորագրեին, այլ պետք է Ադրբեջանի հետ կապիտուլյացիայի ակտ ստորագրեին, որով Ադրբեջանը կճանաչեր Արցախի անկախությունը: Այդ ժամանակ Ադրբեջանը ոչ թե պատերազմ կհրահրեր, այլ՝ «Դուք»-ով կխոսեր մեզ հետ: Հիմա մենք պատրաստ ենք թարմացնել նրանց հիշողությունը»,- ասաց Գ. Սարգսյանը:
Կազմակերպությունից 1or.am-ին տեղեկացրեցին, որ խմբի նախաձեռնություններին աջակցելու համար կարող եք զանգահարել Լուսին Ղազարյանին՝ 099800025 հեռախոսահամարով:
Արմինե Գրիգորյան
