Կաշալոտները սպիտակ շնաձկներ են սպանել
ՀԱՍԱՐԱԿՈՒԹՅՈՒՆ
Մեծ սպիտակ շնաձկներն սկսել են խորհրդավոր կերպով անհետանալ Հարավաֆրիկյան Հանրապետության Կեղծ ծովածոցից:
Քեյփթաունի բնապահպան Մարիան Նյուվուդտն ասել է, որ հայտնի չէ, թե գիշատիչ մեծ սպիտակ շնաձկների Կեղծ ծովածոցից անհետանալն ինչպես կազդի էկոհամակարգի վրա: Իրավիճակը բարդացնում է անհետացման պատճառների չիմացությունը:
Հայտնի է սակայն, որ 3 տարի առաջ ափին հայտնաբերվել են խոշոր վնասվածքներով 5 սպանված շնաձկներ, որոնց լյարդերը բացակայել են: Որոշ մասնագետներ ենթադրում են, որ նրանց սպանել են կաշալոտները, որոնք 11 տարի առաջ ակտիվորեն տարածվել են ՀԱՀ-ի ափերի մոտակայքում: Բացի այդ, շնաձկան լյարդը հարուստ է կետերի համար արժեքավոր սնունդ հանդիսացող ճարպերով:
Վայրի բնության լուսանկարիչ Քրիս Ֆալլոուզը չի հավատում, որ շնաձկներին կետերն են սպանել: Նա գտնում է, որ գիշատիչների անհետացման հարցում մեղավոր են ձկնորսները և նշել է, որ այս խնդիրն առկա է ոչ միայն ՀԱՀ-ում, այլև՝ Ավստրալիայում:
Սակայն, ավելի վաղ՝ փետրվարին, ծովային գիդ Դոնավան Սմիթը տեսանյութ է հրապարակել, որտեղ երևում է, թե ինչպես են երկու կաշալոտներ հետապնդում սպիտակ շնաձկանն ու հարձակման պատրաստվում: Տեսանյութն ավարտվում է այն հատվածում, որտեղ կաշալոտները նավից հեռանալով՝ տեսադաշտից կորչում են՝ անհայտ թողնելով շնաձկան ճակատագիրը:
Սմիթը նշել է, որ տեսանյութը նկարահանել է Քեյփթաունից 400 կմ հեռավորության վրա՝ տուրիստական զբոսանքներից մեկի ընթացքում:
Նյութը հրապարակման պատրաստեց Լիլիթ Ամիրաղյանը:
