Ապրիլի 7-ից մայրաքաղաքի բոլոր շատրվաններն ու ցայտաղբյուրները վերագործարկվելու են
ՀԱՍԱՐԱԿՈՒԹՅՈՒՆ
Երեւանի քաղաքապետի առաջին տեղակալ Կամո Արեյանը քաղաքապետարանի աշխատակազմի շինարարության եւ բարեկարգման, կոմունալ տնտեսության վարչությունների պետերի, ինչպես նաեւ «Ջրային կառույցներ» եւ «Երեւան ջուր» ընկերությունների տնօրենների ուղեկցությամբ շրջել է վարչական շրջաններում եւ տեղում հետեւել ու ծանոթացել մայրաքաղաքի շատրվանների, ջրային ավազանների եւ ցայտաղբյուրների գործարկման նախապատրաստական աշխատանքներին:
Երեւանի քաղաքապետարանից այսօր տեղեկացրել են, որ ջրային կառույցների անխափան գործունեությունն ապահովելու նպատակով ընթացիկ նորոգման ու բարեկարգման աշխատանքներին զուհագեռ իրականացվում են հանգույցների ու պոմպային համակարգերի կարգաբերման, խողովակաշարերի ներկման, տարածքի մաքրման եւ տեխնիկական այլ աշխատանքներ: Զուգահեռ ստուգվում է էլեկտրամատակարարման և ջրամատակարարման հուսալիությունը:
«Երեւանի քաղաքապետի հանձնարարությամբ ջրային կառույցների վերագործարկման ուղղությամբ նախապատրաստական աշխատանքները շարունակվում են: Թեեւ բավական ծավալուն են Հանրապետության հրապարակի եւ Երեւանի հիմնադրման 2750-ամյակի շատրվանների գործարկման աշխատանքները, այդուամենայնիվ շատրվանների մասով մեր աշխատանքները հիմնականում ավարտված են: Առավել ընդգրկուն է ցայտաղբյուրների գործարկումը, որոնց հարցում, ի դեպ, աջակցում է «Երեւան ջուր» ընկերությունը: Բոլոր աշխատանքներն ընթանում են սահմանված ժամանակացույցով եւ արդեն հաճելի ավանդույթի համաձայն մայրաքաղաքի շատրվաններն ու ցայտաղբյուրները միաժամանակ կվերագործարկվեն Մայրության եւ գեղեցկության օրը` ապրիլի 7-ի առավոտյան»,-ընդգծել է Կամո Արեյանը:
