Ինչի՞ մասին կարող է վկայել Թրամփի հոգևոր խորհրդատուի և Գարեգին Երկրորդի հանդիպումը
ՎԵՐԼՈՒԾՈՒԹՅՈՒՆՆԵՐ
Հայաստան էր ժամանել Պոլա Ուայթ-Քեյնը՝ Սպիտակ տան «Հավատքի և հնարավորությունների նախաձեռնությունների գրասենյակի» ավագ խորհրդատուն, ով հայտնի է նաև որպես նախագահ Դոնալդ Թրամփի հոգևոր խորհրդատու, գրում է ng.ru–ն։ Թեև ԱՄՆ-ում նա հայտնի է հարուստների հանդեպ Աստծո սիրո մասին իր յուրօրինակ ելույթներով, ամերիկյան վարչակազմում նրա դերը ներառում է հակակրոնական նախապաշարմունքների դեմ պայքարը և կրոնական ազատությունների պաշտպանությունը։ Հայաստանի իշխանություններն իրենց հերթին օգտագործել են նրա այցը ընդգծելու ՀՀ վարչապետ Նիկոլ Փաշինյանի և Թրամփի միջև հարաբերությունների ջերմությունը։
ԱՄՆ նախագահի, այսպես կոչված, հոգևոր խորհրդատուն Երևան էր ժամանել հոկտեմբերի 1-ին մասնակցելու Փաշինյանի կազմակերպած աղոթքի նախաճաշին։ Հանդիպման ընթացքում Հայաստանի ղեկավարն ընդգծել էր Վաշինգտոնի հետ հաստատված երկխոսության կարևորությունը նաև հույս հայտնելով, որ աղոթքի նախաճաշը հարթակ կծառայի տարբեր երկրների մասնակիցների միջև քննարկումների համար։ Միաժամանակ, Փաշինյանը ողջունել էր Թրամփի, հայ հոգևորականների և ԱՄՆ-ում Հայաստանի դեսպանի մասնակցությամբ վերջերս տեղի ունեցած հանդիպումը նշելով, որ այն ևս մեկ հնարավորություն է աշխարհին հիշեցնելու երկու ազգերի ընդհանուր քրիստոնեական ժառանգության մասին։
Հաջորդ օրը կայացած նախաճաշի ժամանակ Փաշինյանը խոստովանել էր, որ ողջ է մնացել բացառապես Աստծո հանդեպ ունեցած հավատի շնորհիվ։ «Ես ողջ մնացի մեկ պարզ պատճառով, որովհետև հավատում եմ Աստծուն։ Դրա համար այլ պատճառ չկա։ Ամեն դեպքում, ես չեմ կարող, իսկապես չեմ կարող գտնել որևէ այլ պատճառ կամ բացատրություն։ Ուզում եմ շնորհակալություն հայտնել Աստծուն, որ ամեն օր ինձ ասում է. «Վե՛ր կաց և քայլի՛ր»», - ասել է նա։ Բացի այդ, Հայաստանի կառավարության ղեկավարը ափսոսանք էր հայտնել այն փաստի առնչությամբ, որ իր երկիրը 70 տարի անցկացրել է աթեիստական ԽՍՀՄ-ի կազմում։ Նրա խոսքով այդ ժառանգությունը հանգեցրել է նրան, որ հանրապետությունում հավատացյալներին դեռ հաճախ ընկալում են որպես մարգինալներ: Միևնույն ժամանակ, Փաշինյանը համոզված է, որ Հայաստանի քաղաքացին պետք է հավատացյալ լինի, քանի որ հենց այս հանրապետությունն է հայ ժողովրդի «Ավետյաց երկիրը»։
«Կարևոր է, որ այդ հոգևոր կյանքը դուրս գա եկեղեցու սահմաններից և մտնի տներ, ինչպես նաև, ներողություն եմ խնդրում, շուկա, տեղական ինքնակառավարման մարմիններ, կառավարություն, ինչպես նաև օրենսդիր, գործադիր և դատական իշխանության մարմիններ... Մարդն ավելի քիչ խոցելի է կոռուպցիոն ռիսկերի նկատմամբ, եթե հավատում է Աստծուն», - եզրափակել էր նա։
Ուշագրավ է այն, որ Հայ Առաքելական Եկեղեցու (ՀԱԵ) ղեկավարը՝ Կաթողիկոս Գարեգին Բ-ն, բացակայում էր բուն նախաճաշից։ Փաշինյանը նրան մեղադրում է տարբեր խախտումների մեջ, այդ թվում կուսակրոնության ուխտի խախտման, կոռուպցիայի և պետական դավաճանության մեջ։ «Դուք կարող եք նրան ընկալել որպես Կաթողիկոս կամ սուրբ, սակայն Հայաստանի բնակիչների մեծ մասն ասում է, որ նա պարզապես Կտրիճ Ներսիսյանն է», - ավելի վաղ հայտարարել էր Հայաստանի Ազգային ժողովի նախագահ Ալեն Սիմոնյանը։
Այնուամենայնիվ, այս ամենը չէր խոչընդոտել ՀԱԵ ղեկավարին հոկտեմբերի 4-ին հանդիպել ԱՄՆ-ից ժամանած հյուրի հետ։ Ուայթ-Քեյնը և Գարեգին Բ-ն ընդգծել են կրոնի և հոգևոր արժեքների դերը ազգերի համար անվտանգ, բարեկեցիկ և առաջադեմ կյանք կառուցելու գործում։ Նրանք համաձայնել են նրան, որ Աստծո հանդեպ հավատը պետք է դրսևորվի սիրո, արդարության և մերձավորի հանդեպ հոգատարության միջոցով և նման կերպ ամրապնդի համընդհանուր համերաշխությունն ու խաղաղ գոյակցությունը։ Ուայթ-Քեյնը շնորհակալություն է հայտնել Կաթողիկոսին ջերմ ընդունելության համար և ընդգծել Հայաստանի հարուստ քրիստոնեական ժառանգությունը որպես ժողովրդի հավատի կենդանի վկայություն։
Իսկ ահա Ազգային ժողովի նախագահ Ռուբեն Ռուբինյանը հայտարարել է, որ խորհրդարանում ստեղծվել է քննիչ հանձնաժողով ուսումնասիրելու այն ճգնաժամը, որն «առաջացել է Հայ Առաքելական Եկեղեցում (ՀԱԵ) որոշ հոգևորականների գործողությունների հետևանքով, ինչպես նաև դրա հետևանքները»։ Ըստ Ռուբինյանի հանձնաժողովը կուսումնասիրի եկեղեցու կողմից «հայերի հոգևոր կյանքում, ազգային մշակույթի զարգացման և ազգային ինքնության պահպանման գործում իր յուրահատուկ առաքելությունը չկատարելու» հարցը։ Ազգային ժողովի նախագահը պնդել է, որ պատգամավորների առնվազն մեկ քառորդն է պահանջել ստեղծել այդ մարմինը։ Ընդդիմությունը հրաժարվել է մասնակցել նման գործընթացներին։
Բացի դա Հայաստանի ֆինանսների նախարար Վահե Հովհաննիսյանը BOON TV-ին տված հարցազրույցում հայտարարել է, որ կառավարությունը մտադիր է հարկեր սահմանել եկեղեցու համար։ Նրա խոսքով եկեղեցուց գանձված միջոցները կուղղվեն կրոնական ծրագրերի ֆինանսավորմանը։ «Եկեղեցին պետք է հարկեր վճարի, ինչպես բոլորը», - ընդգծել է Հովհաննիսյանը։
Հարկման շրջանակի վերաբերյալ հարցին ի պատասխան նախարարը մատնանշել է ծիսական պարագաներն ու առևտրային գործունեության այլ ձևերը։ Նա նշել է, որ թեև ընդհանուր քաղաքական նպատակը սահմանված է, դրա իրականացման համապատասխան մեխանիզմը դեռ պետք է որոշվի։ Նա նաև նշել է, որ հարկային ավելի անբարենպաստ պայմաններ սահմանող փոփոխությունները պետք է ընդունվեն ուժի մեջ մտնելուց վեց ամիս առաջ, սակայն այդ պահանջը չի տարածվում հարկային արտոնությունների չեղարկման վրա։ Այդուհանդերձ, եկեղեցու արտոնությունների չեղարկումը, օրինակ նոյեմբերին, իրատեսական չի լինի, քանի որ համապատասխան առաջարկը նախ պետք է անցնի հանրային քննարկումների փուլը։
Հարկ է հիշեցնել, որ Հայաստանի և Հայ Առաքելական եկեղեցու (ՀԱԵ) միջև հարաբերությունները կարգավորող 2007 թվականի օրենքը եկեղեցու ստացած նվիրատվություններն ու նվերները, ինչպես նաև ծիսական պարագաների արտադրությունն ու վաճառքը ազատում է ավելացված արժեքի հարկից (ԱԱՀ)։ Հարկային օրենսգիրքը նաև կրոնական ծառայություններն ու կրոնական պարագաների վաճառքն է ազատում ԱԱՀ-ից։ Եկեղեցին վճարում է մյուս բոլոր հարկերը։
«Փաշինյանը, հավանաբար, ցանկանում է ցույց տալ, որ միջազգային հանրությունը, այդ թվում կրոնական կազմակերպությունները, սատարում են հոգևոր ոլորտում իր վարած քաղաքականությանը։ Սակայն այն փաստը, որ Պոլա Ուայթ-Քեյնը հանդիպել է Կաթողիկոսի հետ, լուրջ հարված է հասցրել վարչապետին։ Սա կարելի է դիտարկել որպես ազդանշան Փաշինյանին, որ եկեղեցու դեմ նրա մոլեգին արշավը չի վայելում Սպիտակ տան աջակցությունը։ Կտեսնենք, արդյո՞ք նա կհամարձակվի կոնկրետ քայլերի դիմել ապավինելով բացառապես Եվրոպայի աջակցությանը, որը Ռուսաստանի հետ առճակատման մոլուցքի մեջ պատրաստ է աչք փակել նրա ցանկացած հակաժողովրդավարական քայլի վրա... Ընդհանուր առմամբ, ակնհայտ է, որ նրա որոշումները կոպտորեն խախտում են Սահմանադրությունը, որը պահանջում է պետության կողմից եկեղեցու գործերին չմիջամտել», — ng.ru–ին տված հարցազրույցում նշել է Ռազմավարական հետազոտությունների և նախաձեռնությունների վերլուծական կենտրոնի ղեկավար Հայկ Խալաթյանը։
Նյութը հրապարակման պատրաստեց Կամո Խաչիկյանը
www.1or.am
