ԵՄ երկրներում գազի գների աճը տարվա սկզբից կազմել է 140 տոկոս. Ֆոն դեր Լայեն

Եվրամիության երկրներում գազի գների աճը տարվա սկզբից կազմել է 140%, բայց Եվրահանձնաժողովը շարունակում է պահանջել մինչև 2027 թվականի վերջը ամբողջությամբ հրաժարվել Ռուսաստանից գազի գնումներից, ինչպես նաև մտադիր է միավորել և իր վերահսկողության տակ վերցնել ԵՄ գազի ներմուծման գործընթացը։ Նման հայտարարությամբ է հանդես եկել Եվրահանձնաժողովի ղեկավար Ուրսուլա ֆոն դեր Լայենը Ստրասբուրգում Եվրախորհրդարանի նիստում, հաղորդում է ՏԱՍՍ-ը:

«Փետրվարից ի վեր ԵՄ-ում գազի գներն աճել են 140%-ով», - ընդգծել է նա։ ԵՀ ղեկավարը նշել է, որ 2026 թվականի սկզբից ԵՄ-ն գազի ներմուծման համար 100 միլիարդ եվրոյով ավելի է վճարել, քան 2025 թվականին, ընդ որում՝ չներմուծելով ոչ մի մոլեկուլով ավելի, քան նախկինում:

Իրականում, Եվրոստատի տվյալներով, տարվա առաջին ինը ամսվա ընթացքում եվրոպական երկրների կողմից գազի ներմուծումը կրճատվել է ավելի քան 5%-ով՝ 2025 թվականի համեմատ։

«Մենք բոլորս զգում ենք այս գները։ Բիզնեսը ճնշման տակ է, մարդիկ հազիվ են վճարում հաշիվները, և այս իրավիճակը կարող է վատթարանալ ձմռանը մոտենալուն զուգընթաց», - ասել է ֆոն դեր Լայենը՝ կոչ անելով գործել անհապաղ, որպեսզի ԵՄ-ն այս ճգնաժամից հետո ավելի ուժեղ դուրս գա:

Նա կոչ է արել մեծացնել ներդրումները կանաչ և ատոմային գեներացիայի մեջ և կրճատել Ռուսաստանից գազի գնումները: Նրա խոսքով՝ Ռուսաստանից գազի ներկրումն արդեն նվազել է մինչև պատերազմի սկզբի ամբողջ եվրոպական ներմուծման 45%-ից մինչև այսօրվա 12%-ը:

«ԵՄ-ն այն կհասցնի զրոյի հաջորդ տարվա վերջին», - խոստացել է Եվրահանձնաժողովի ղեկավարը։