Փորձագետ Ստեպանով. ՆԱՏՕ-ի երկրները ցանկանում են Հայաստանը վերածել Անդրկովկասյան հենակետի

ՆԱՏՕ-ի երկրները փորձում են Հայաստանը վերածել Անդրկովկասյան հենակետի, ինչի մասին վկայում են ԱՄՆ-ի, Ֆրանսիայի և Հունաստանի զինվորականների մասնակցությամբ «Արծիվ գործընկեր» զորավարժությունների անցկացման ծրագրերը, ինչպես նաև հանրապետության վերազինումը արևմտյան չափանիշներով: Այդ կարծիքը tass.ru-ին հայտնել է Ռուսաստանի նախագահական ազգային տնտեսության և պետական կառավարման ակադեմիայի (RANEPA) իրավունքի և ազգային անվտանգության ինստիտուտի ռազմական փորձագետ Ալեքսանդր Ստեպանովը:

Փորձագետի խոսքով Հայաստանը 1992 թվականից ի վեր գտնվում է Հյուսիսատլանտյան դաշինքի ազդեցության ուղեծրում, սակայն երկու կողմերի միջև ռազմական և քաղաքական փոխազդեցությունը հիմա է հասել իր գագաթնակետին: «Սա շատ լուրջ մարտահրավեր է, և պարզ է, որ Վաշինգտոնն ու Փարիզը, իհարկե, այս գործընթացի հիմնական շարժիչ ուժերն են։ Փարիզը առանձին խաղ է խաղում, քանի որ վաղուց է համագործակցում Հայաստանի հետ իր անվտանգության մարմինների միջոցով և քննարկում է ռազմատեխնիկական համագործակցության և զենքի մատակարարման զարգացման տարբերակներ։ Ավելին, բանակցություններ են ընթանում միջուկային էներգիայի ոլորտում համագործակցության վերաբերյալ։ Միտումն այն է, որ առավելագույնի հասցվի Հայաստանի ներգրավվածությունը դաշինքում և այն վերածվի ՆԱՏՕ-ի հենակետի հարավային տարածաշրջանում և, փաստացի, ամբողջ Անդրկովկասում», - ասել է նա։

Ըստ Ստեպանովի Ֆրանսիան ակտիվորեն ընդլայնում է իր ռազմատեխնիկական գործընկերությունը Հայաստանի հետ ընդլայնելով ռազմական մատակարարումների շրջանակը։ Այդ համագործակցության հիմնական ասպեկտը ռադարային համակարգերի փոխանցումն է, որը թույլ է տալիս Փարիզին զարգացնել իր հետախուզական հնարավորությունները տարածաշրջանում։

Նյութը հրապարակման պատրաստեց Կամո Խաչիկյանը

www.1or.am