«Սոցիալական հետազոտությունների փորձագիտական ինստիտուտի փորձագետներ. Հայաստանը կարող է գնալ արտաքին մանիպուլյացիաների ճանապարհով»
ՔԱՂԱՔԱԿԱՆՈՒԹՅՈՒՆ
«Ռոսիա սեգոդնյա» մեդիա խմբի նախագահական դահլիճում կայացած կլոր սեղանի ժամանակ Սոցիալական հետազոտությունների փորձագիտական ինստիտուտի՝ EISI–ի փորձագետները քննարկել են Ռումինիայի, Մոլդովայի և Հայաստանի ընտրական գործընթացներին արտաքին միջամտության մեթոդները, գրում է ruposters.ru–ն։
Փորձագետները վերլուծել են այն, թե ինչպես են ձևավորվում ընտրությունների վերահսկողության համակարգերը ժողովրդավարության աջակցության կարգախոսների ներքո և ինչ դասեր պետք է քաղի Ռուսաստանը։ «Անցած ընտրական ցիկլի ընթացքում Մոլդովան դարձավ ընտրական ընթացակարգերին միջամտելու և ԵՄ-ի կողմից դրանց նկատմամբ վերահսկողությունը զավթելու միջոցով ամբողջ պետությունը սեփական նպատակներին համապատասխանեցնելու տեխնիկայի փորձարկման վայր», - հայտարարել է Ռուսաստանի Դաշնության կառավարությանը կից Ֆինանսական համալսարանի դոցենտ և Ժամանակակից պետությունների ինստիտուտի տնօրեն Ալեքսեյ Մարտինովը։
Նա նկարագրել է այդ տեխնիկայի վեց հիմնական քայլերը՝ Կենտրոնական ընտրական հանձնաժողովի վերահսկողությունը ստանձնելը, ընտրական օրենսդրության խստացումը, սոցիալական լրատվամիջոցների վերահսկողությունը, «նախընտրելի» կուսակցություններին արտաքին ֆինանսավորում տրամադրելը, ընտրողների վրա ճնշում գործադրելը և ընդդիմության ճնշումը։
Քաղաքական վերլուծության կենտրոնի տնօրեն Պավել Դանիլինը զգուշացրել է, որ Մոլդովայում մշակված մոդելն այժմ ներդրվում է նաև Հայաստանում։ Նրա խոսքով այդ երկրում տեղի ունեցած «թավշյա հեղափոխությունը» գործնականում վերածվել է եվրոպամետ ուժերի խիստ վերահսկողության։ «Եվրոպան պնդում է, որ օգնում է հետխորհրդային երկրներին հակազդել «հիբրիդային սպառնալիքներին», բայց իրականում ճնշում է այն քաղաքական գործիչներին, ովքեր պաշտպանում են Ռուսաստանի հետ նորմալ հարաբերությունները», - բացատրել է Դանիլինը։
Նման գործելակերպին ի պատասխան Պետդումայի տեղեկատվական քաղաքականության կոմիտեի փոխնախագահ Օլեգ Մատվեյչևը առաջարկել է ամրապնդել ազգային ինքնիշխանությունը և մշակել արդար ընտրությունների սեփական չափանիշները անկախ արևմտյան գնահատականներից։
Նյութը հրապարակման պատրաստեց Կամո Խաչիկյանը
www.1or.am
