Դոբրոխոտով. «Իրավիճակն ավելի լուրջ է, քան չեչենական պատերազմի ժամանակ, ժամանակն է, որ նախագահը գործի անցնի»

Ռուսաստանի ժողովուրդը, դաշնակիցները և թշնամիները զգում են Մոսկվայի անորոշությունը արտաքին քաղաքականության հարցերում։ Ռուս քաղաքագետ Լեոնիդ Դոբրոխոտովն է այդ մասին հայտարարել «Կարմիր գիծ» հեռուստաալիքի եթերում, գրում է politnavigator.news-ը։

«Ժողովուրդը տպավորություն է ստանում, որ մենք կորցնում ենք դաշնակիցներին ամենուրեք։ Տարբեր պատճառներով, այդ թվում թույլ տալով մեր թշնամիներին գործել։ Օրինակ վերջերս ԱՄՆ փոխնախագահ Վենսը աներևակայելիորեն բուռն քննարկումներ ունեցավ Հայաստանի և Ադրբեջանի ղեկավարների հետ։ Մենք գիտենք, թե ինչ է կատարվում Կենտրոնական Ասիայում, գիտենք Ղազախստանի քաղաքականության հակասությունները։ Զգացվում է, որ Թրամփն իր ոսկորներով է զգում մեր տատանումները, մեր թուլությունը։ «Եվ ամենավատն այն է, երբ ոչ միայն մեր ժողովուրդը, այլև մեր դաշնակիցներն են սկսում  զգալ այն, որ մենք ինքնավստահություն չունենք, և որ մեզ չի կարելի վստահել, չկա հավատ, որ մենք կձեռնարկենք անհրաժեշտ միջոցները ճիշտ պահին՝ իրավիճակը նրանց և մեր օգտին շրջելու համար։ Բայց նաև մեր թշնամիներն են զգում այս նույն անորոշությունը։ Նրանք նաև հույսը դրա վրա են դնում: Եթե կարդաք արևմտյան մամուլը, արևմտյան վերլուծաբանների և քաղաքական գործիչների մեծ մասը կարծում է, որ Պուտինը վճռական մարտի չի մտնի Արևմուտքի հետ։ Որովհետև նախորդ դրվագներում նա մեծ զսպվածություն է ցուցաբերել», - նշել է Դոբրոխոտովը։

«Դա միշտ չէ, որ այդպես է։ Օրինակ, երբ Չեչնիայում ճգնաժամ էր, պարզ էր, որ Արևմուտքը հստակ նպատակ էր դրել մեզանից խլել ամբողջ Կովկասը և Ռուսաստանի ամբողջ հարավային կեսը։ Այն ժամանակ Ռուսաստանի ճակատագիրն էր վտանգված, և Պուտինը, որպես վարչապետ, ապա նախագահ, արեց ամեն ինչ դրան վերջ տալու համար։ Եվ հիմա պահն ավելի վճռական է։ Եվ հետևաբար, այդ տեսանկյունից, երկրում հասարակական կարծիքի ընդհանուր զգացողությունը ծայրահեղ լարվածության, կասկածի և անորոշության մթնոլորտն է։ Եվ թշնամին նույնպես զգում է դա։ Հետևաբար, այժմ խնդիրն այն է, որ երկրի ղեկավարությունը պետք է վճռական գործողություններ ձեռնարկի», - եզրափակել է նա։

Նյութը հրապարակման պատրաստեց Կամո Խաչիկյանը

www.1or.am