«Մենք կորցրել ենք Հայաստանը». Ռուսաստանում արձագանքել են Վենսի Երևան այցին

Ռուսաստանը կորցրել է Հայաստանը: Արևմուտքը այդ երկիրը «անվճար նվերներով» է ողողել՝ առանց վիզայի ճանապարհորդության և Եվրոպայում ու Միացյալ Նահանգներում կրթության համար դրամաշնորհների տեսքով: Հետևաբար, Երևանն այժմ համաձայնագիր է կնքել Վաշինգտոնի հետ քաղաքացիական միջուկային համագործակցության վերաբերյալ որպես Ռուսաստանից էներգետիկ կախվածությունը նվազեցնելու իր ծրագրի մաս: Այդ մասին gazeta.ru-ի հետ զրույցում ասել է քաղաքագետ Ռաֆայել Օրդուխանյանը:

«Այն ժամանակ վճռական գործողություններ չձեռնարկվեցին  Փաշինյանի հակառուսական ռեժիմի դեմ <…> Արևմուտքն այժմ Հայաստանը ողողել է անվճար նվերներով՝ գործնականում առանց վիզայի ճանապարհորդություն դեպի Եվրոպա, էժան ավիատոմսեր, կրթության համար դրամաշնորհներ, և հասարակական կարծիքը Փաշինյանի կողմն է: Մենք կորցրել ենք Հայաստանը, ուստի հիմա որևէ բան անելն անիմաստ է», - կարծիք է հայտնել քաղաքագետը: Օրդուխանյանը նշել է, որ Հայաստանի քաղաքական դաշտում չի մնացել ոչ մի ռուսամետ ուժ: Միևնույն ժամանակ, ԱՄՆ պաշտոնյաները մտադրություն չունեն զիջել Ռուսաստանին Հարավային Կովկասում Վաշինգտոնի ազդեցությունը ամրապնդելու հարցում: «Տեղեկատվական տարածքը վերահսկվում է անգլոսաքսոնների կողմից, այնտեղի բնակչությունը լիովին բթացած է <…> Նրանց գայթակղել են ներդրումներով։ Ահա թե ինչ», - նկարագրել է Հայաստանում ստեղծված իրավիճակը Օրդուխանյանը։

Հիշեցնենք, որ Երևան կատարած այցի ժամանակ ԱՄՆ փոխնախագահ Վենսը քաղաքացիական միջուկային համագործակցության համաձայնագիր է ստորագրել Հայաստանի հետ խոստանալով մինչև 9 միլիարդ դոլարի պոտենցիալ ներդրումներ Ռուսաստանից էներգետիկ կախվածությունը նվազեցնելու դիմաց։ Հնարավոր միջուկային համաձայնագիրը ԱՄՆ-ի ավելի լայն ջանքերի մի մասն է ամրապնդելու իր դիրքերը Հարավային Կովկասում՝ տարածաշրջանային դաշինքների փոփոխության ֆոնին, և հաջորդում է ԱՄՆ նախագահ Դոնալդ Թրամփի միջնորդությամբ կնքված Հայաստանի և Ադրբեջանի միջև խաղաղության համաձայնագրի նախագծին։