Ըստ փորձագետի «Թրամփի ճանապարհի» նպատակներից մեկն էլ հայկական ուրանն է

Հայաստանում «Թրամփի ճանապարհ» նախագծի (TRIPP)  նպատակներից մեկն էլ հանրապետության Սյունիքի մարզի, որտեղով նախատեսվում է անցկացնել այդ երթուղին, ուրանի հանքավայրերի նկատմամբ վերահսկողություն հաստատելն է, կարծում է հայ էներգետիկ անվտանգության փորձագետ և քաղաքագետ Վահե Դավթյանը, գրում է ria.ru–ն։

«TRIPP-ի նպատակն է նաև վերահսկել Սյունիքի հանքային պաշարները, այդ թվում ուրանի հանքավայրերը», - ասել է Դավթյանը։ Նա նշել է, որ ուրան պարունակող հանքավայրերի քարտեզը, որը կազմվել է հայ հանքային ռեսուրսների կառավարման առաջատար փորձագետ, երկրաբանական և հանքաբանական գիտությունների դոկտոր և ակադեմիկոս Պետրոս Ալոյանի կողմից, ցույց է տալիս, որ Սյունիքի մարզում գտնվում է ուրանի մեծ տարածք։ Փորձագետը կարծում է, որ Վաշինգտոնի աշխարհատնտեսական նպատակն է համընթաց քայլել Չինաստանի և Ռուսաստանի հետ, որտեղ ատոմային էներգիայի զարգացումը ընթանում է հեղափոխական տեմպերով։ Մասնավորապես, նա նշել է թորիումի ռեակտորների և արագ նեյտրոնային ռեակտորների զարգացումը։ «Հատկանշական է այն, որ մինչ օրս Ռուսաստանը մնում է ԱՄՆ շուկային հարստացված ուրանի ամենամեծ մատակարարը», - նշել է փորձագետը։

Նա նաև կարծիք է հայտնել, որ Վաշինգտոնը ձգտում է կանխել Ֆրանսիային ուրանի մատակարարումների հնարավոր դիվերսիֆիկացումը՝ հաշվի առնելով Փարիզի թուլացած դիրքերը Նիգերում և Գաբոնում։ «TRIPP-ը արդյունավետորեն ապահովում է Վաշինգտոնի ներկայությունը միջազգային Եվրոպա-Կովկաս-Ասիա միջանցքում, որը միաժամանակ թույլ է տալիս լուծել բազմաթիվ լոգիստիկ, էներգետիկ, ընդերքի օգտագործման և ռազմաքաղաքական հարցեր», - նշել է փորձագետը։

Հիշեցնենք, որ 2025 թվականի օգոստոսի 8-ին, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի ԱՄՆ նախագահ Դոնալդ Թրամփի հետ հանդիպումից հետո, հայկական կողմը համաձայնել է համագործակցել Վաշինգտոնի և երրորդ կողմերի հետ ստեղծելու «Թրամփի երթուղին միջազգային խաղաղության և բարգավաճման համար» երթուղին։ Այդ երթուղին նախատեսում է Ադրբեջանի մայրցամաքային մասի և նրա Նախիջևանի ինքնավար մարզի միջև տրանսպորտային կապերի ապաշրջափակում Հայաստանի տարածքով։ Ինչպես Փաշինյանը հայտարարել է օգոստոսի 9-ին, երթուղին վերաբերում է նավթի և գազի խողովակաշարերին, էլեկտրահաղորդման գծերին և ինտերնետային մալուխներին, ինչպես նաև Երևանի և Բաքվի միջև երկաթուղուն՝ Իրանին սահմանակից երկաթուղու երկայնքով։

Նյութը հրապարակման պատրաստեց Կամո Խաչիկյանը

www.1or.am