Մասնագետը գնահատել է Հայաստանի ռիսկերը տրանսպորտային միջանցքների մրցակցության պայմաններում

Մինչ Հայաստանում շարունակվում են TRIPP տրանսպորտային միջանցքի նախագծի իրականացման վերաբերյալ քննարկումները, Իրանն ու Ադրբեջանը արագ տեմպերով կառուցում են այլընտրանքային երթուղի՝ Արազի միջանցքը, գրում է ritmeurasia.ru-ն։
Այդ ենթակառուցվածքի հիմնական օղակը՝ Աղբանդ-Կալալա կամուրջը, նախատեսվում է ավարտել մինչև 2026 թվականի մարտը։ Ընդ որում Երևանը անգամ չի պատրաստել TRIPP-ի համար տեխնիկատնտեսական ուսումնասիրություն, իսկ գործնական փուլը նախատեսված է 2026 թվականին։

Իրանագետ Նվեր Դավթյանը նշել է, որ Թեհրանի և Բաքվի միջև Իրանի տարածքում 50 կիլոմետրանոց մայրուղու կառուցման վերաբերյալ բանակցությունները սկսվել են դեռևս 2022 թվականին։

«Թեհրանը բազմիցս է հայտարարել, որ իր սահմաններին նման միջանցքը անընդունելի է և առաջարկել է իրանական այլընտրանք», - հիշեցրել է փորձագետը։ 

Այժմ մայրուղու վրա լայնածավալ աշխատանքներ են ընթանում. իրականացվել են պայթեցման գործողություններ, կառուցվում են ճանապարհներ և թունելներ։ TRIPP նախագիծը նախատեսում է 43 կիլոմետրանոց երկաթուղային գծի կառուցում Հայաստանի Սյունիքի մարզով, որը կապելու է Ադրբեջանը Նախիջևանի հետ և, ի վերջո, ինտեգրվելու է միջազգային Հյուսիս-Հարավ և Արևելք-Արևմուտք միջանցքներին։ Սակայն, ըստ Դավթյանի, այդ երթուղին մտահոգություն է առաջացնում Իրանի և Չինաստանի մոտ՝ ԱՄՆ-ի հնարավոր ազդեցության պատճառով։ Թեհրանը վախենում է, որ Հայաստանով անցնող միջանցքը կարող է դառնալ քաղաքական ճնշման գործիք։

Մասնագետի խոսքով Երևանի ռազմավարական շահագրգռվածությունը կայանում է հարևանների շահերը հավասարակշռող երկիրը հուսալի տրանսպորտային հանգույցի վերածելու մեջ։ Դրան հասնելու համար Հայաստանը պետք է ուշադիր գնահատի այն նախագծերը, որոնք կարող են տարածաշրջանային լարվածություն ստեղծել և ձգտի ապահովել, որ խոշոր ենթակառուցվածքային նախաձեռնությունները ընկալվեն որպես միմյանց լրացնող, այլ ոչ թե մրցակցային։

Նյութը հրապարակման պատրաստեց Կամո Խաչիկյանը

www.1or.am