Մասնագետները գնահատել են Հայաստանի լոգիստիկ ռիսկերը. խափանումներ Իրանում, և այլընտրանք Ադրբեջանի միջոցով

Հարավային Իրանով և Վրաստանով անցնող երթուղիների  խափանումների պատճառով Հայաստանը բախվել է լուրջ լոգիստիկ մարտահրավերների, ինչը ստիպել է իշխանություններին դիտարկել այլընտրանքային երթուղիներ, այդ թվում տարանցիկ փոխադրումներ Ադրբեջանով, հաղորդել է «Սպուտնիկ Արմենիան», գրում է ritmeurasia.ru–ն։
«Կարգո Էքսպրես» լոգիստիկ ընկերության տնօրեն Արթուր Աբեշյանը հայտնել է, որ Իրան-Հայաստան սահմանին ուշացումները հասել են չորս օրվա և պայմանավորված են տեխնիկական խափանումներով, այլ ոչ թե անվտանգության սպառնալիքներով։ Ձմռանը իրանական երթուղին նախընտրելի է եղանակային պայմանների պատճառով, սակայն անկայունությունը ստիպում է բեռները ժամանակավորապես վերաուղղորդել Վերին Լարսի սահմանային անցակետ։

Տնտեսագետ Կարեն Ադոնցն էլ շեշտել է Իրանի ռազմավարական կարևորությունը, որը ապահովում է Հայաստանի լոգիստիկ գործընթացների մոտ 30%-ը, այդ թվում Մերձավոր Արևելքի շուկաներ մուտք գործելը։ Նա նշել է, որ Իրանի շուրջ լարվածությունը կարող է երկարատև լինել և կապված է աշխարհաքաղաքական գործոնների համադրության հետ։ Այս պայմաններում Ադրբեջանի միջով անցնող այլընտրանքային երթուղիները երկարաժամկետ հեռանկարում չեն կարող համարվել հուսալի, քանի որ դրանք ստեղծում են միակողմանի կախվածության ռիսկ։ Ադոնցը զգուշացրել է, որ առանց տնտեսական դիվերսիֆիկացիայի և արդյունաբերական զարգացման Հայաստանը կմնա խոցելի։ Նա նշել է, որ արտաքին պարտքի աճը կարող է կտրուկ արագանալ, եթե արտահանումը և արտարժույթի եկամուտները նվազեն: Մասնագետը կոչ է արել վարել հավասարակշռված քաղաքականություն, որը հաշվի կառնի տարածաշրջանի բոլոր խոշոր խաղացողների շահերը և շեշտը կդնի ընդհանուր արտադրական շղթաներին ինտեգրման վրա, որպեսի խուսափի  այնպիսի հիմնական, բայց փխրուն ոլորտների վրա ազդեցությունից, ինչպիսիք են զբոսաշրջությունը և շինարարությունը:

Նյութը հրապարակման պատրաստեց Կամո Խաչիկյանը

www.1or.am