Ֆրանսիան կոչ է արել Իրանին զիջումների գնալ

Իրանը պետք է զիջումների գնա՝ ԱՄՆ ռազմական միջամտությունից խուսափելու համար, ասել է Ֆրանսիայի արտաքին գործերի նախարար Ժան-Նոել Բարոն Liberation-ին տված հարցազրույցում։

Նրա խոսքով՝ ԱՄՆ-ն նախապատրաստություններ է տեսել Իրանի դեմ ռազմական գործողության համար։ «Նրանք ռեժիմին առաջարկել են բանակցություններ, որոնցից այն պետք է օգտվի, անի էական զիջումներ և արմատապես փոխի իր դիրքորոշումը», - նշել է նախարարը։

Բարոն ասել է, որ Իրանը «պետք է դադարի սպառնալիք լինել տարածաշրջանում իր հարևանների և մեր անվտանգության շահերի համար, իսկ Իրանի ժողովուրդը պետք է վերականգնի իր ազատությունը»։ Նա կոչ է արել Թեհրանին «դադարեցնել բռնաճնշումները և տեղեկատվական շրջափակումը», ազատ արձակել ձերբակալվածներին և թույլ տալ Ֆրանսիայի քաղաքացիներ Սեսիլ Կոլերին և Ժակ Պարիին լքել երկիրը։

Ռուս-ուկրաինական պատերազմի վերաբերյալ նախարարը նշել է, որ եվրոպական երկրները պետք է կարողանան ուղղակիորեն խոսել Ռուսաստանի հետ. «Եվրոպացիները, որոնք ներկայումս Ուկրաինայի հիմնական ֆինանսական և ռազմական աջակիցներն են, պետք է ունենան իրենց շահերը պաշտպանելու միջոց՝ առանց պատասխանատվությունը որևէ մեկին տեղափոխելու»։

Բարոն նաև հայտարարել է Ֆրանսիայի կառավարության մտադրության մասին՝ ամրապնդել համագործակցությունը Հնդկաստանի հետ՝ ԱՄՆ-ի և Չինաստանի միջև ստեղծված լարվածության ֆոնին։