Հայաստանի իշխանությունները պատրաստ են մոռանալ թե՛ ցեղասպանությունը, թե՛ Արցախը

Հայաստանը մտադիր է բացել իր բոլոր սահմանները։ Այդ մասին հայտարարել է ՀՀ նախագահ Վահագն Խաչատուրյանը Դավոսում կայացած միջազգային տնտեսական ֆորումում, գրում է politnavigator.news-ի թղթակիցը։

«Մենք ունենք Թուրքիայի նման հարևան։ Մենք պետք է բացենք մեր սահմանները։ Նույնը վերաբերում է նաև Իրանին և Վրաստանին։ Այդ երկրներում տեղի ունեցող իրադարձությունների վերաբերյալ կան տարբեր գնահատականներ, բայց մենք կարող ենք օգտակար լինել միմյանց, ինչը փոխադարձ շահերից է բխում», - ասել է Խաչատուրյանը։ Նա հայտարարել է, որ Երևանը ակնկալում է արագ դիվանագիտական ​​հարաբերություններ հաստատել թե՛ Թուրքիայի, թե՛ Ադրբեջանի հետ՝ Արևմուտքի կողմից աջակցվող «Միջին միջանցք» նախագծին մասնակցելու համար (որն ուղղված է Ռուսաստանի և Իրանի շահերի դեմ)։

«Երբ մենք նայում ենք քարտեզին, ամենահարմար երթուղին միշտ անցնում է մեր տարածաշրջանով։ Այն Մետաքսի ճանապարհի ամենաարդյունավետ երթուղիներից մեկն է, որն ապացուցել է իրեն։ Այն չի օգտագործվել վերջին 30 տարիների ընթացքում՝ 1991 թվականից հետո։ Այստեղ ես տեսնում եմ ապագայի նկատմամբ լավատեսության հիմքեր», - ասել է Խաչատուրյանը։

Այնուամենայնիվ, նա ընդունել է, որ իշխանությունների համեմատ, հայ բնակչությունը գոհ չէ նման մերձեցումից: «Միամտություն կլինի նույնը սպասել հասարակությունից»,– ավելացրել է նա։

Հիշեցնենք, որ Թուրքիայի և Հայաստանի միջև սահմանը փակ է 1993 թվականից՝ Անկարայի նախաձեռնությամբ։ Երկրների միջև բարդ հարաբերությունները պայմանավորված են մի շարք հանգամանքներով, որոնք կապված են Անկարայի կողմից Ադրբեջանի դիրքորոշման աջակցության և Թուրքիայի կողմից 1915 թվականին Օսմանյան կայսրությունում տեղի ունեցած Հայոց ցեղասպանության միջազգային ճանաչման գործընթացին կտրուկ արձագանքի հետ։

Նյութը հրապարակման պատրաստեց Կամո Խաչիկյանը

www.1or.am