Հայաստանը քաղաքակրթության բնօրանն է

Արդեն մի քանի տարի է, ինչ ՀՀ ԳԱԱ Հնագիտության և ազգագրության ինստիտուտը մի շարք հնագիտական ​​պեղումներ է իրականացնում Արարատյան դաշտի գյուղերում։ Անցյալ տարի հնագետների որոնումները հանգեցրին անսովոր կառույցի հայտնաբերման, որը կանգնեցվել էր մ.թ.ա. 3-2-րդ հազարամյակներում։ Հետաքրքիրն այս պատմության մեջ այն է, որ կառույցն իր ձևով շատ է նման Եգիպտոսում և Մեքսիկայում հայտնաբերված բուրգերին, գրում է m.ok.ru–ն:

Հիշեցնենք, որ Երևանի և Մասիսի շրջակայքում կատարված հնագիտական ​​պեղումների վաղ ուսումնասիրությունների ժամանակ հայտնաբերվել են նեոլիթյան դարաշրջանի հնագույն հուշարձաններ։ Ինչպես նշել է Հնագիտության և ազգագրության ինստիտուտի տնօրեն Պավել Ավետիսյանը, հայտնաբերված հուշարձանների մի մասը (կլոր կավե կառույցներ, ոսկորներից ու քարերից պատրաստված գործիքներ) ոչնչացվել են, սակայն պահպանվել են այն շերտերը, որոնք եղել են դրանց մակերեսին։ Փորձաքննությունը հաստատել է, որ այդ հուշարձանները Քրիստոսի ծնունդից առաջ մի քանի հազար տարվա վաղեմություն ունեն։

«Հայ-ամերիկյան արշավախմբի աշխատանքի շնորհիվ մենք հայտնաբերեցինք պատմական հուշարձաններ և եզակի արտեֆակտ, որտեղ պատկերված են ավելի քան 6 հազար տարվա վաղեմություն ունեցող գծանկարներ։ Սա մեծ ձեռքբերում է», - ասել է գիտնականը:

Հետազոտողների աշխատանքը շարունակվել է նաև Երվանդաշատում, Արմավիրում, Արտաշատում, Դվինում։ Այնտեղ անսովոր կառույց է հայտնաբերվել, սակայն ինչ-ինչ պատճառներով հետազոտությունները ժամանակավորապես դադարեցվել էին։

«Մեր վերջնական նպատակն է հայտնաբերել հուշարձաններ, որոնք մեզ կտան տեղեկություններ վաղ քարի դարից մինչև ուշ միջնադար»,- ասել է Պավել Ավետիսյանը։

Վերջերս էլ Արարատյան դաշտում գտնվող հնագետների մեկ այլ խումբ Դվինի մոտ հայտնաբերել է մի հետաքրքիր եռանկյունաձև կառույց՝ ամբողջությամբ ծածկված հողով։ Ըստ Վազգեն Գևորգյանի այդ կառույցը ստեղծվել է մ.թ.ա. 3-2 հազարամյակներում և թվագրվում է Հայասա պետության ժամանակներով։

«Այդ կառույցի ուսումնասիրությունով կարելի է ենթադրել, որ դա բուրգ է։ Սակայն, համեմատած եգիպտականների հետ, մերն իր կառուցվածքով հիշեցնում է մայաների ցեղի բուրգերը (որոնք գտնվել են Տեոտիուականում)»,- ասել է Գեւորգյանը։

Բուրգի բարձրությունը 25 մետր է, դա գրեթե ինը հարկանի շենքի բարձրություն է: Վազգեն Գևորգյանի խոսքով, մի խումբ հետազոտողներ արդեն սկսել են պեղել բուրգը, որը մի քանի հազար տարի թաղված է եղել է հողի մեծ շերտի տակ։

Մեկ այլ վարկած էլ կա, որ այդ կառույցը ծառայում էր որպես ապաստան թշնամիներից, որտեղ հաճախ թաքնվել են տեղի բնակիչները։ Սակայն, թե իրականում ի՞նչ է տեղի ունեցել, դեռ պարզ չէ: Բայց հիմա հաստատ է մի բան՝ այդ բուրգը ևս մեկ անգամ հաստատում է, որ Հայաստանը բաց երկնքի տակ թանգարան է՝ բազմաթիվ գաղտնիքներով ու առեղծվածներով, որոնք դեռ պետք է պարզվեն։

Նյութը հրապարակման պատրաստեց Կամո Խաչիկյանը

www.1or.am