Զինծառայող Արսեն Մխիթարյանի հարազատները բացառում են ինքնասպանության վարկածը

Հայաստանի Զինված ուժերի Տավուշի մարզում (Շամշադինում) գտնվող զորամասերից մեկի մարտական դիրքում մահացած հայտնաբերված 19-ամյա ժամկետային զինծառայող Արսեն Մխիթարյանի հարազատները վստահ են, որ նա ինքնասպան չի եղել։

Նրա բարեկամը NEWS.am-ի հետ զրույցում ասաց, որ Արսենը գոհ է եղել ծառայությունից։

«Բացառվում է, որ ինքնասպան լիներ։ Միշտ զանգել, ուրախ զվարթ խոսել է, իր մոտ ամեն ինչ նորմալ է եղել։ Ոչինչ չէր կարող աննորմալ լինել, քանի որ ինքն այդ տղան չէր»,- ասաց բարեկամը՝ նշելով, որ նրա հետ վերջին զրույցը հենց դեպքից մեկ օր առաջ է եղել, Արսենը լավ տրամադրություն է ունեցել։

Հարեւանների բնորոշմամբ Արսենը խելացի, զուսպ տղա էր։

«Յուրահատուկ, հարգված ընտանիքի երեխա էր, ահավոր ցավ է բոլորիս համար։ Ինքը այնքան համեստ երեխա էր, որ բակով էլ անցնում էր, ամաչում էր դեմքիդ նայեր։ Երբեք ոչ մեկի հետ կոնֆլիկտի մեջ չէր մտնի, ոչ մի անգամ ձայնը բարձր չէիր լսի»,- ասաց հարեւաններից մեկը։

Արսենը ապրում էր Արմավիր քաղաքում, արհեստավորի ընտանիքում։ Նա Երեւանի պետական բժշկական համալսարանի ուսանող էր, սովորում էր ատամնաբուժական ֆակուլտետում։ Նա երկու քույր ունի, որոնցից ավագը նույնպես սովորում է Բժշկական համալսարանում։

Նշենք, որ Արսեն Մխիթարյանի մահվան դեպքի առթիվ հարուցվել է քրեական գործ՝ ՀՀ ՔՕ 110-րդ հոդվածի 1-ին մասի հատկանիշներով՝ ինքնասպանության հասցնելը:

Ըստ ՔԿ տվյալների՝ 2016թ. հուլիսի 3-ին՝ ժամը 10:30-ի սահմանում, ՀՀ ՊՆ N զորամասի մարտական դիրքում հայտնաբերվել է ժամկետային զինծառայող, շարքային Արսեն Մխիթարյանի դին՝ կզակի շրջանում մահացու հրազենային վնասվածքով։