Կատարը հայտարարել է, որ Իսրայելը դեռևս պաշտոնապես չի արձագանքել Գազայում հրադադարի վերաբերյալ առաջարկին

Կատարի արտաքին գործերի նախարարության խոսնակ Մաջիդ ալ-Անսարին օգոստոսի 26-ին հայտարարել է, որ միջնորդները դեռևս սպասում են Իսրայելի պաշտոնական արձագանքին Գազայի հատվածում հրադադարի համաձայնագրի վերաբերյալ։ 

«Արմենպրես»-ի փոխանցմամբ՝ այս մասին հայտնում է Al Jazeera-ն։

Ալ-Անսարիի խոսքով՝ Իսրայելը ո՛չ ընդունել է ՀԱՄԱՍ-ի կողմից հաստատված առաջարկը, ո՛չ մերժել, ո՛չ էլ առաջարկել այլընտրանք և, ենթադրաբար, չի ցանկանում անել դա։

«Առաջարկը ներկայացվել է։ Այս առաջարկը 98%-ով համապատասխանում է այն պահանջներին, որոնք իսրայելցիները ներկայացրել են մի քանի շաբաթ առաջ։ Հենց նրանք այժմ չեն արձագանքում։ Հետևաբար, ամբողջ պատասխանատվությունը կրում է իսրայելական կողմը, որը չի արձագանքել միջնորդների կողմից ներկայացված և ՀԱՄԱՍ-ի կողմից հաստատված պաշտոնական առաջարկին», - լրագրողներին ասել է նա։

Ալ-Անսարին ընդգծել է, որ միջնորդների միջև շփումը շարունակվում է Գազայի հատվածում հրադադարի հասնելու համար՝ կոչ անելով միջազգային հանրությանը ճնշում գործադրել Իսրայելի վրա։

«Կատարը Գազայի հատվածում որևէ դրական փոփոխություն չի տեսնում, այլ միայն Գազա քաղաքի օկուպացիայի սպառնալիքներ, օգնություն սպասող քաղաքացիական անձանց և լրագրողների վրա հարձակումներ»,- հավելել է նա:

Եգիպտոսը Կատարի հետ համակարգված ձգտում է վերադառնալ 60-օրյա ժամանակավոր հրադադարի համաձայնագրին, որի ընթացքում ազատ արձակվեն 10 իսրայելցի պատանդներ և կհանձնվեն դիակներ: Այնուհետև անհապաղ բանակցություններ կանցկացվեն ավելի համապարփակ համաձայնագրի շուրջ՝ ապահովելու համաձայնագրի կնքումը Գազայի հատվածում պատերազմի ավարտի հաջորդ օրը: