Մարզպետը բոյկոտել է տոնը․ «Հրապարակ»

«Հրապարակ» օրաթերթը գրում է․ Ուրբաթ-շաբաթ օրերին Սյունիքի մարզի Գորիս, Կապան համայնքներում նշել են այդ քաղաքների տոնը։ Եթե Գորիսում ամեն ինչ նորմալ է անցել, ապա Կապանում տոնը, կարելի է ասել, հարամվել է։ Հայտնի է, որ մարզպետ Ռոբերտ Ղուկասյանն ու համայնքապետ Գեւորգ Փարսյանը ոչ այնքան ջերմ հարաբերություններ ունեն, չնայած վերջերս որոշակի մեղմացել է լարվածությունը, բայց ամբողջությամբ չի հարթվել։

Մեզ ասացին, որ մարզպետն ակնկալել է՝ Փարսյանը կգա իր աշխատասենյակ, եւ միասին կայցելեն հերոսների հիշատակին նվիրված Բաղաբուրջի հուշահամալիր, որից հետո կսկսեն տոնական միջոցառումների շարքը, սակայն Փարսյանը չի արդարացրել մարզպետի հույսերը:

Ղուկասյանն էլ չի այցելել հուշահամալիր եւ նախորդ տարիների պես՝ միայն շնորհավորական ուղերձ է հղել։ Մեզ սկզբում ասացին, թե մարզպետարանների ենթակայության տակ գտնվող հիմնարկների աշխատակիցները հուշահամալիրում` լսելով եւ տեսնելով, որ մարզպետը չի մասնակցելու, ժեստ են արել նրան եւ իրենք էլ չեն մասնակցել Կապանի մշակույթի տանն անցկացվող հանդիսավոր միջոցառմանը, թեպետ վարկած կա, որ մարզպետն է նման հրահանգ տվել՝ ձախողել Փարսյանի կազմակերպած միջոցառումը։

Դպրոցների տնօրենները, ուսուցիչները եւ այլ կոլեկտիվներ տանը նստած են հետեւել հարազատ Կապանի տոնին, հատուկենտ անհնազանդներ են մասնակցել, որոնց, ըստ մեր աղբյուրի, պատրաստվում են պատժել։ Ինչպես նախորդ, այս տարի էլ ընդդիմադիրներ են ներկա եղել, ելույթ է ունեցել «Հայաստան» խմբակցության պատգամավոր, կապանցի Աննա Գրիգորյանը։