«Հայաստանի իշխանությունների կողմից ՀԱԵ-ի նկատմամբ հետապնդումները բացատրել են Փաշինյանի ռեժիմի խուճապով»

Հայ Առաքելական Եկեղեցու և նրա համար պայքարող գործարար ու բարերար Սամվել Կարապետյանի նկատմամբ Հայաստանի իշխանությունների կողմից հետապնդումները վկայում են վարչապետ Նիկոլ Փաշինյանի ռեժիմի խուճապի մասին, ria.ru–ին տված հարցազրույցում ասել է գործարար և Ֆրանսիայի հայկական սփյուռքի անդամ Միշել Աբրահամյանը։ «Այս հետապնդումները (Սամվել Կարապետյանի  և հոգևորականության) վկայում են այն մասին, որ վարչապետ Փաշինյանի ռեժիմը խուճապի մեջ է։ Փաշինյանը հայտնվել է դժվարին իրավիճակում», - ասել է գործակալության զրուցակիցը։

Աբրահամյանի խոսքով Փաշինյանն իշխանության է եկել նախապատրաստված թավշյա հեղափոխության ալիքի վրա, որին աջակցել է Արևմուտքն իր այնպիսի արժեքներով, ինչպիսիք են օրենքի գերակայությունը և բացարձակ ազատությունը, այսինքն «այն ամբողջ ծանր հռետորաբանությունը, որը մենք գիտենք»։ Սակայն այդ ամենը ոչնչացվել է, և Փաշինյանն ինքն Արևմուտքի հետ դաշինքի ֆոնին հիմա դժվարին իրավիճակում է հայտնվել Ռուսաստանի հետ հարաբերությունների խզման պատճառով, նշել է գործարարը։ «Հիմա Փաշինյանը հակասության մեջ է հայ ժողովրդի հետ, ժողովուրդը նրան ասում է. «Բավական է, մենք այլևս ոչինչ չունենք տալու, ո՞ւր ենք գնում»։ Եվ հիմա նա հարձակվում է հայկական ինքնության հիմքի վրա, նրանց վրա, ովքեր հանդիսանում են այդ ինքնության պաշտպանության ամրոցը, այսինքն եկեղեցու վրա», - հավելել է Աբրահամյանը։

Ինչպես նշել է նա, Կարապետյանն իսկական հայրենասեր է։ Բարերարի արժանիքների թվում, մասնավորապես, նշվում է Հայաստանում էներգամատակարարման վերականգնմանը ցուցաբերած օգնությունը։ Բացի այդ, Կարապետյանը հանդես է եկել Եկեղեցու աջակցության օգտին՝ լինելով նրա հավատարիմ հետևորդը։ «Իմ կարծիքով, Փաշինյանը պետք է հեռանա իշխանությունից։ Հայաստանի համար միակ կենսունակ լուծումը վարչապետին փոխելն է... Չարիք է արվել, Փաշինյանը չափն անցել է։ Եկեղեցու վրա այս նողկալի հարձակումները, ցանկացած ընդդիմության ոչնչացնելու և լռեցնելու այս ցանկությունը, ի վերջո, նրան կհասցնեն վերջնակետին», - կարծիք է հայտնել Աբրահամյանը։

Նյութը հրապարակման պատրաստեց Կամո Խաչիկյանը

www.1or.am