Հայաստանում ձերբակալված Սամվել Կարապետյանի Ֆրանսիայի դեմ հայցի մասին
ՔԱՂԱՔԱԿԱՆՈՒԹՅՈՒՆ
«Տաշիր» ընկերությունների խմբի ղեկավար Սամվել Կարապետյանը, ով ձերբակալվել է Հայաստանում, հունիսի սկզբին ներդրումային վեճերի կարգավորման միջազգային կենտրոնում արբիտրաժային վարույթ է սկսել Ֆրանսիայի դեմ, գրել է «Կոմերսանտը», գրում է forbes.ru–ն։ Հրատարակությունը ենթադրել է, որ հայցը կարող է վերաբերել միլիարդատիրոջ Լազուրի ափին գտնվող 120 միլիոն եվրո արժողությամբ առգրավված առանձնատանը։ Իրավաբանների կարծիքով, Հայաստանում քրեական հետապնդումը կարող է թուլացնել Կարապետյանի դիրքերը դատարանում Ֆրանսիայի իշխանությունների դեմ։
Խոսքը Ռոքբրյուն-Կապ-Մարտեն հանգստավայրում գտնվող Իրինա Մարիայի առանձնատան մասին է, որը պաշտոնապես պատկանում է Կարապետյանին։ 2024 թվականի փետրվարին Ֆրանսիայի դատարանը սառեցրել է առանձնատան սեփականության իրավունքը, Փարիզի դատախազությունը համարել է, որ դրա իրական շահառուն «Գազպրոմի» դուստր ընկերությունն է, այն ժամանակ հաղորդել էր ֆրանսիական «Le Monde» թերթը։
«Կոմերսանտը» համապատասխան տվյալների բազայում պարզել է, որ Կարապետյանն արբիտրաժային վարույթ է սկսել 2025 թվականի հունիսի սկզբին։ Գործի նյութերը և պահանջների էությունը նշված չեն, բայց վեճի առարկան անշարժ գույքն է։ Միևնույն ժամանակ, գործի նյութերում հիշատակվում է Ֆրանսիայի և Հայաստանի միջև 1995 թվականի ներդրումների փոխադարձ խրախուսման և պաշտպանության մասին համաձայնագիրը։
Ինչպես բացատրել է փաստաբան Գեորգի Սուխովը, այդ փաստաթուղթը նախատեսում է համաձայնագրի կողմերի փոխադարձ պարտավորություն չբռնագրավել ներդրողների գույքը, իսկ եթե բռնագրավումը տեղի ունենա, ապա պետք է վճարվի փոխհատուցում։ «Պրավովայա Գրուպա» ՍՊԸ-ի գործընկեր Վլադիմիր Շալաևը ենթադրում է, որ պահանջը կապված է Կարապետյանի Ֆրանսիայում գույքի բռնագրավման հետ։
Ըստ «Վեճերի լուծման ակումբի» կառավարիչ գործընկեր Օլգա Շչեդրակովայի դատավարությունը խոստանում է երկար և դժվար լինել: Նա Դեյվիդ Գոլդբերգին, որի ընկերությունը դատարանում ներկայացնում է Կարապետյանի շահերը, անվանել է միջազգային արբիտրաժի շատ հայտնի և փորձառու մասնագետ:
Սուխովն ընդգծել է, որ Կարապետյանի նկատմամբ Հայաստանում ներկայիս քրեական հետապնդումը կարող է թուլացնել նրա դիրքերը Ֆրանսիայում ընթացող դատավարությունում: «Վինդեր» իրավաբանական ընկերության գործընկեր Գոռ Եգորյանը խոստովանել է, որ ֆրանսիական կողմը կարող է օգտագործել Կարապետյանի հետապնդումները Հայաստանում ակտիվների ձեռքբերման օրինականության վերաբերյալ կասկածներ հայտնելու համար:
Հայաստանում Կարապետյանին մեղադրանք է առաջադրվել իշխանությունը զավթելու հրապարակային կոչերի համար, Երևանի դատարանը նրան երկու ամսով կալանավորել է: Տեղական լրատվամիջոցների փոխանցմամբ այս ամենը սկսվել է այն բանից հետո, երբ նա հանդես է եկել Հայ Առաքելական Եկեղեցու (ՀԱԵ) պաշտպանության օգտին, ինչը կտրուկ քննադատության է արժանացել ՀՀ վարչապետ Նիկոլ Փաշինյանի կողմից։
Նյութը հրապարակման պատրաստեց Կամո Խաչիկյանը
