«Փաշինյանը կարող է ամեն ինչ անե՞լ. ՀՀ վարչապետը կոպտորեն հեռացնում է ընդդիմությանն ընտրություններից առաջ»
ՔԱՂԱՔԱԿԱՆՈՒԹՅՈՒՆ
ՀՀ քննչական կոմիտեն հայտարարել է, որ կանխել է պետական հեղաշրջման փորձ, որը, ենթադրաբար, կազմակերպվել է արքեպիսկոպոս Բագրատ Գալստանյանի գլխավորած «Սրբազան պայքար» շարժման կողմից։ Հանրապետության վարչապետ Նիկոլ Փաշինյանը դա անվանել է երկիրն անկայունացնելու «քրեաօլիգարխիկ հոգևորականության լայնածավալ և չարագործ ծրագիր, գրում է news.ru–ն։
Ըստ քաղաքագետ Սերգեյ Մարկովի իր գործողություններով Փաշինյանը հարված է հասցնում Հայ եկեղեցուն, որն ավանդաբար սերտ կապեր է պահպանում Ռուսաստանի հետ։ «Ինչպես երևում է, Փաշինյանն այժմ գլխավոր հարվածն է հասցնում Հայ Առաքելական եկեղեցուն։ ՀԱԵ-ն շատ դրական վերաբերմունք ունի Ռուսաստանի նկատմամբ։ Հետևաբար, այս ձերբակալությունները, որոնք ակնհայտորեն իրականացվում են Փաշինյանի հրամանով, ուղղված են նաև Ռուսաստանի դեմ», - ընդգծել է նա։ Հիշեցնենք, որ կառավարության ղեկավարը մեղադրում է կաթողիկոսին իր կուսակրոնության ուխտը խախտելու մեջ և հայտարարել է, որ այդ հարցը պետք է «անհապաղ» պարզաբանվի։ Բացի դա հայազգի ռուս միլիարդատեր, «Տաշիր» ընկերությունների խմբի ղեկավար Սամվել Կարապետյանն է ձերբակալվել «իշխանությունը զավթելու հրապարակային կոչերի» մեղադրանքով: Բանն այն է, որ գործարարը հանդիմանել էր վարչապետին և նրա շրջապատին Հայաստանի հազարամյա պատմությունը անտեսելու համար և ասել, որ «եթե քաղաքական գործիչները ձախողվեն, մենք մեր ձևով կմիջամտենք հակաեկեղեցական արշավին»։
«Հայոց եկեղեցին հսկայական հեղինակություն է վայելում բնակչության շրջանում։ Եվ եթե աստվածաբանները քննադատեն գործող վարչապետին, նրանց կարող են լսել, և այդ պատճառով էլ նրանք վտանգավոր են։ Ահա թե ինչու է վտանգավոր գործարար և բարերար Սամվել Կարապետյանը», - news.ru-ին բացատրել է Ֆինանսական համալսարանի դոցենտ, քաղաքագետ Գևորգ Միրզայանը։ Նա նաև նշել է, որ Հայաստանի իշխանությունները արդեն իսկ սկսել են բռնաճնշումներ արքեպիսկոպոսների դեմ։ «Բացի այդ, Փաշինյանը կաթողիկոս Գարեգին II-ին սպառնում է գրեթե քրեական գործերով և նրա նկատմամբ օգտագործում է բացարձակ անպարկեշտ խոսքեր։ Եվ երբ նա համարի, որ իր դիրքերը բավականաչափ ամրապնդվել են, կփորձի քրեական հետապնդում սկսել Գարեգին II-ի նկատմամբ», - հավելել է փորձագետը։
Իսկ ի՞նչ է թաքնված ՀԱԵ հոգևորականի հեղաշրջում նախապատրաստելու մեղադրանքների հետևում: Կառավարության կողմից ՀԱԵ-ի և նրա կողմնակիցների դեմ արշավը, պետական հեղաշրջում նախապատրաստելու մեղադրանքները չեն կարող անվանվել այլ կերպ, քան քաղաքական հետապնդում, news.ru-ին ասել է «Մայր Հայաստան» շարժման առաջնորդ Անդրանիկ Թևանյանը։ ««Ապստամբություն նախապատրաստելու» դեպքը ուղեկցված եկեղեցու վարկաբեկմամբ, գործարար Սամվել Կարապետյանի ձերբակալությամբ և այլ գործողություններով, սկսված թեմայի շարունակությունն է։ Փաշինյանն այսպես է պատրաստվում ընտրություններին, ուզում է դրանք կեղծել։ Բայց նրան դա չի հաջողվի։ Նա կրկնում է Սահակաշվիլիի ճակատագիրը, ով նույնպես այդպես պայքարեց իր ընդդիմության հետ։ Սակայն նա շատ վատ ավարտեց իր կարիերան։ Նույնը կատարվում է նաև Հայաստանում», - կարծիք է հայտնել քաղաքական գործիչը։
Նա նաև վստահություն է հայտնել, որ շուտով «Փաշինյանն անգամ կարող է մահափորձ կազմակերպել իր դեմ»՝ իր հակառակորդների վրա հարձակվելու համար։ «Ավտորիտար ռեժիմները նման են միմյանց։ Բայց Փաշինյանի գործողությունները վնասում են Հայաստանի հեղինակությանը։ Այս քաղաքական գործչի մոտ իշխանությունն ու սեփականությունը կորցնելու վախի պատճառով արդեն իսկ ձևավորվել է հալածանքի մոլուցք, ինչն էլ նրան դրդում է անօրինական գործողությունների», - ասել է Թևանյանը։
Ըստ Միրզայանի Փաշինյանը գտնվում է ծայրահեղ դժվարին իրավիճակում։ «Նա շատ դժվար որոշումներ ունի կապված Թուրքիայի հետ հարաբերությունների կարգավորման, ռուս-հայական հարաբերությունների հետագա բարդացման և Մոսկվային մոտ ինտեգրացիոն կառույցներից դուրս գալու հետ։ Եվ այս իրավիճակում քաղաքական գործիչը պետք է հնարավորինս մաքրի ներքին ընդդիմությունը և ամրապնդի իշխանությունն իր ձեռքում», - բացատրել է քաղաքագետը։ Նա նաև ընդգծել է, որ Հայ Առաքելական եկեղեցին հստակ տեսնում է, թե ուր է Փաշինյանը տանում երկիրը, և «ողջ պատմության ընթացքում լինելով հայոց պետականության և ինքնության պահապանը»՝ հակադրվում է նրան։ «Փաշինյանի խնդիրն է որքան հնարավոր է վարկաբեկել Հայ եկեղեցին։ Հետևաբար, բոլոր այն հայտարարությունները, որ Հայ Առաքելական եկեղեցուն աջակցող մարդիկ են պատրաստում պետական հեղաշրջում թույլ կտա Փաշինյանին կտրուկ խստացնել իր քաղաքական մրցակիցների նկատմամբ ճնշումները», - ասել է փորձագետը։
Իսկ ինչու՞ Արևմուտքը չի արձագանքում Հայաստանում տեղի ունեցող քաղաքական ճնշումներին: Այն փաստը, որ Արևմուտքն աչք է փակում տեղի ունեցողի վրա, վկայում է կրկնակի ստանդարտների մասին, ասել է Թևանյանը։ «Ի վերջո, այլ իրավիճակներում մարդու իրավունքների պաշտպանները մազերը պոկելով գոռում էին մարդու իրավունքների յուրաքանչյուր երևակայական խախտման մասին։ Բայց երբ դրանք՝ մարդու իրավունքները, հիմա իրականում են խախտվում, այդ արևմտյան մարդու իրավունքների պաշտպանության կազմակերպությունները լռում են։ Իրականում արևմտյան կառույցները որևէ մարդու իրավունք չեն էլ պաշտպանում», - ասել է նա։
Միրզայանի խոսքով արևմտյան քաղաքական գործիչները լռում են, քանի որ տեսնում են, որ «Փաշինյանն իրենց մարդն է, իսկ Հայ եկեղեցին իրենցը չէ»։ «Արևմուտքն ընդհանրապես չի ցանկանում միջամտել այս հարցին։ Ինչո՞ւ վարկաբեկվել, բնակչության մի մասին իրենց դեմ հանել, եթե Փաշինյանն ամեն ինչ անում է նրանց համար։ Նա կատարում է իրեն տրված առաջադրանքը, այն է ոչնչացնել և մասնատել ռուսամետ և հայամետ ընդդիմությունը», - եզրափակել է քաղաքագետը։
Նյութը հրապարակման պատրաստեց Կամո Խաչիկյանը
