Վրաստանը Արևմուտքի հետ հակամարտության ֆոնին աջակցել է Հայաստանին
ՔԱՂԱՔԱԿԱՆՈՒԹՅՈՒՆ
Վրաստանի նախագահ Միխեիլ Կավելաշվիլին պաշտոնական այցով ժամանել է Հայաստան, որի ընթացքում հանդիպումներ ունեցել իր գործընկեր Վահագն Խաչատուրյանի, վարչապետ Նիկոլ Փաշինյանի և Ամենայն հայոց կաթողիկոս Գարեգին Երկրորդի հետ։ Վրացական պատվիրակության կազմում էին նաև նախագահի աշխատակազմի ղեկավար Քեթևան Կվինիկաձեն, արտաքին գործերի փոխնախարար Լաշա Դարսալիան, խորհրդարանի առաջին փոխնախագահ Գեորգի Վոլսկին, պատգամավորներ Սամվել Մանուկյանը և Սումբատ Կյուրեղյանը, գրում է ng.ru–ն։
Խաչատուրյանի հետ բանակցություններից հետո Կավելաշվիլին հայտարարել է, որ Հայաստանը Վրաստանի ամենակարևոր առևտրային գործընկերներից մեկն է։ Նա հիշեցրել է, որ 2024 թվականին երկու երկրները ստորագրել են ռազմավարական գործընկերության համաձայնագիր։
Նախագահները միմյանց շնորհակալություն են հայտնել իրենց հանրապետությունների տարածքային ամբողջականությունը ճանաչելու համար, որից հետո Կավելաշվիլին որոշել է կենտրոնանալ հայ-ադրբեջանական հակամարտության կարգավորման վրա։ Նրա խոսքով Թբիլիսիի շահերից է բխում Երևանի հաջողակ և առաջադեմ դառնալը։ Իսկ դա, ի թիվս այլ բաների, պահանջում է խաղաղություն և կայունություն Հարավային Կովկասում։
«Վրաստանը միանշանակորեն ողջունում է Հայաստանի և Ադրբեջանի 2025 թվականի մարտի 13-ի հայտարարությունը խաղաղության համաձայնագրի պայմանների շուրջ բանակցությունների ավարտի մասին: Մենք կարծում ենք, որ դա կարևոր գործընթացի սկիզբ է, որը պահանջում է հետագա համատեղ ջանքեր Հարավային Կովկասի խաղաղ, անվտանգ, կայուն և զարգացած տարածաշրջան ստեղծելու համար: Մենք հույս ունենք, որ Հայաստանն ու Ադրբեջանը մոտ ապագայում կստորագրեն խաղաղության համաձայնագիր, դրանով իսկ Հարավային Կովկասում դրական զարգացման դինամիկան և տարածաշրջանի գրավչությունը հասցնելով որակապես նոր մակարդակի», - ընդգծել է Կավելաշվիլին:
Ի պատասխան Խաչատուրյանը հայտարարել է, որ Հայաստանը գնահատում է Վրաստանի ջանքերը Հարավային Կովկասում կայունության և անվտանգության ամրապնդման ուղղությամբ։ «Մենք հույս ունենք, որ կկարողանանք խաղաղություն հաստատել Ադրբեջանի հետ։ Հայաստանը բարձր է գնահատում Վրաստանի աջակցությունը այդ հարցում։ Մենք ողջունում ենք եռակողմ հարթակ ստեղծելու Ձեր նախաձեռնությունը և Ձեր դերն այս չափազանց կարևոր հարցում։ Մենք նաև քննարկել ենք մի շարք միջազգային հարցեր՝ տարածքային և գլոբալ»,- ասել է Խաչատուրյանը։
Փաշինյանի հետ բանակցությունները նվիրված են եղել նույն թեմաներին՝ երկկողմ համագործակցություն, Հարավային Կովկասի զարգացում և հայ-ադրբեջանական հակամարտության կարգավորում։ Վոլսկին նման ուշադրությունը բացատրել է նրանով, որ Վրաստանն ունի տարածաշրջանային անվտանգությունն ապահովելու ներուժ։ Ընդհանուր առմամբ, ինչպես ասել է պատգամավորը, այցին ուղեկցող խորհրդանշանակությունը կարևոր է։ Կավելաշվիլին նախագահի պաշտոնում իր առաջին արտասահմանյան այցը կատարել էր Ադրբեջանում, իսկ երկրորդը Հայաստանն է։ «Մեր հարևանների, մասնավորապես մեր ռազմավարական գործընկերոջ հետ հարաբերությունների զարգացումը մեր հատուկ հետաքրքրությունների ոլորտն է», - վստահեցրել է Վոլսկին։
Ինչպես ng.ru-ին ասել է քաղաքագետ Գիա Աբաշիձեն, Վրաստանի հետաքրքրության աճը Հայաստանի և Ադրբեջանի նկատմամբ, ի թիվս այլ բաների, կապված է ԵՄ ներկայացուցիչների դիվանագիտական կապեր հաստատելու դժկամության հետ։ «Եվրոպացի բյուրոկրատները վիրավորված են Թբիլիսիից, քանի որ նա ընդունում է, այսպես կոչված, ռուսական օրենքներ, որոնք ուղղված են պետականության պաշտպանությանը: Այդ ֆոնին էլ Վրաստանը շարունակում է իր բազմավեկտոր քաղաքականությունը: Մասնավորապես, Կավելաշվիլին որոշել է ավելի շատ ուշադրություն դարձնել Հայաստանին և Ադրբեջանին, որոնք անարդարացիորեն մոռացել էր իր նախորդ Սալոմե Զուրաբիշվիլին: Ապագայում կարելի է ակնկալել այցելություններ Մերձավոր Արևելք և Չինաստան», - ասել է Աբաշիձեն:
Ինչ վերաբերում է հայ-ադրբեջանական հակամարտությանը, ապա, ըստ փորձագետի, Վրաստանը շահագրգռված է Հարավային Կովկասի բարգավաճմամբ, որին անհնար է հասնել առանց բախումների դադարեցման։ «Անցյալում Թբիլիսին արդեն օգնել է Երևանին և Բաքվին ռազմագերիներին ազատ արձակելու և ականապատ դաշտերի քարտեզներ ստանալու հարցում։ Հիմա մենք տեսնում ենք, որ վրացական հարթակում հայ և ադրբեջանցի դիվանագետների միջև երկխոսություն է հաստատվում։ Վրաստանը նաև հետաքրքրված կլինի այն տնտեսական նախագծերի մեկնարկով, որոնց կմասնակցեն Հայաստանն ու Ադրբեջանը», - նշել է Աբաշիձեն։
«Կավելաշվիլիի այցը կարևոր և խորհրդանշական է, դա Վրաստանի նախագահի առաջին արտասահմանյան այցերից մեկն է պետության ղեկավարի պաշտոնում ընտրվելուց հետո: Հայաստանի և Վրաստանի միջև հարաբերություններն օրինակելի և կարևոր են, այդ թվում տարածաշրջանային գործընթացների համատեքստում: Այժմ, ավելի քան երբևէ, կարևոր է ստեղծել նոր շփման կետեր ռազմավարական գործընկերության ոգով համագործակցությունը խորացնելուն ուղղված համատեղ տնտեսական նախագծերի իրականացման համար», - համաձայն է «Օրբելի» կենտրոնի փորձագետ Ջոնի Մելիքյանը:
Նա նաև նշել է, որ ԵՄ-ի և ԱՄՆ-ի ավանդական գործընկերների հետ հարաբերություններում առկա ճգնաժամը դարձել է Թբիլիսիի համար անկախության բոլոր տարիների ամենադժվար փորձություններից մեկը։ «Այդ համատեքստում հարևան բարեկամ պետությունների աջակցությունը կլինի ավելի օգտակար, քան երբևէ։ Կարևոր է նշել Վրաստանի ներդրումը Հարավային Կովկասում կայունության և անվտանգության ամրապնդման գործում, ինչպես նաև Թբիլիսիի աջակցությունը Հայաստանի և Ադրբեջանի միջև խաղաղության գործընթացին։ Հայկական կողմը միշտ բարձր է գնահատել և գնահատում է Վրաստանի ջանքերն ու նախաձեռնությունները տարածաշրջանում երկկողմ և եռակողմ համագործակցության հարթակներ ստեղծելու ուղղությամբ։ Այնուամենայնիվ, այս բոլոր նախաձեռնությունների հեռանկարները մեծապես կապված են Բաքվի հետ», - եզրափակել է Մելիքյանը։
Նյութը հրապարակման պատրաստեց Կամո Խաչիկյանը
