«Եվրաքվեն» ընդունեցին, մնացին հետևանքները

Խորհրդարանը երեկ երկրորդ ընթերցմամբ և ամբողջությամբ ընդունել է Եվրամիության անդամակցության գործընթացի մեկնարկի մասին օրինագիծը: Օրինագիծն ընդունվեց 64 կողմ, 7 դեմ ձայների հարաբերակցությամբ: Կողմ էին իշխող «Քաղաքացիական պայմանագրի» պատգամավորներն ու խմբակցությունից հեռացված Հովիկ Աղազարյանը, Աղազարյանի կուսակից Հակոբ Ասլանյանը դեմ էր, դեմ էին նաև անկախ պատգամավոր Գեղամ Նազարյանն ու «Պատիվ ունեմ» խմբակցության պատգամավորները: «Հայաստան» դաշինքը ողջ կազմով չի մասնակցել քվեարկությանը։

Նախագիծը Հայաստանի պատմության մեջ թերևս ամենակարճ օրինագիծն է, այն բաղկացած է 25 բառից կազմված միայն մեկ նախադասությունից։ «Հայաստանի Հանրապետությունը, նպատակ ունենալով զարգացնել ժողովրդավարական ինստիտուտները, բարձրացնել հասարակության բարեկեցությունը, ամրապնդել երկրի անվտանգությունը, դիմակայությունը և իրավունքի գերակայությունը, հայտարարում է Հայաստանի Հանրապետության Եվրոպական միությանն անդամակցելու գործընթացի մեկնարկը», - ասվում է օրենքում։

Ընդ որում, առաջինից երկրորդ ընթերցում նախագծից հանվել է «արտահայտելով ժողովրդի կամքը» արտահայտությունը։ ՔՊ-ն, թերևս, հասկացել է, որ ժողովրդի կամքը կարող է արտահայտվել միայն հանրաքվեով, իսկ 60 հազար ստորագրությունը դեռ «ժողովրդի կամք» չէ։ Այդուհանդերձ, օրենքն արդեն ընդունված է, և այժմ իշխանությունները պետք է առնչվեն դրա օգուտների և հետևանքների հետ։ Իսկ հետևանքներ, անշուշտ, լինելու են։ ՌԴ-ն թե՛ իշխանությունների նախկինում արած քայլերը, թե՛ այս օրենքի ընդունումը դիտարկելու է որպես իր դեմ կատարված գործողություն։

Թեպետ, Փաշինյանն ու իր թիմը հակված էին ձգձգելու օրենքի ընդունումը, բայց Արևմուտքի ճնշումն ավելի մեծ է եղել, և այժմ նոր խնդիրներ են սպասվում։ Իսկ Հայաստանին Եվրոպայում ոչ ոք չի էլ սպասում։

Էլլա Մարգարյան