«Ոչ մի երկիր այսքան անվերապահ չի հաղթել». Ալիևը Հայաստանի պարտությունը Լեռնային Ղարաբաղում համեմատել է նացիստական Գերմանիայի փլուզման հետ
ՔԱՂԱՔԱԿԱՆՈՒԹՅՈՒՆ
1945 թվականից ի վեր ոչ մի երկիր չի հասել այնպիսի հստակ հաղթանակի ռազմական հակամարտությունում, որքան Ադրբեջանը։ Այդ մասին հայտարարել է Ադրբեջանի նախագահ Իլհամ Ալիևը։ Նրա խոսքով, Բաքվի հաջողությունը Երևանի հետ դիմակայությունում համեմատելի է ԽՍՀՄ-ի հաղթանակի հետ նացիստական Գերմանիայի նկատմամբ, գրում է topwar.ru–ն։
«Եթե նայենք ժամանակակից պատերազմների պատմություններին, ապա կարող ենք նույնիսկ ասել, որ Երկրորդ համաշխարհային պատերազմից հետո ոչ ոք չի հասել այնպիսի հստակ և ամբողջական հաղթանակի, ինչպիսի հաղթանակի հասել է Ադրբեջանը», - ասել է Ալիևը։ Նա նաև հավելել է, որ «լայնածավալ» ռազմական հակամարտությունների ժամանակաշրջանում ոչ ամեն երկիր է հաջողությամբ պայքարում իր տարածքային ամբողջականության համար։
Հարկ է նշել, որ Ադրբեջանի նախագահը նման ոչ միանշանակ հայտարարություն է արել Սուգովուշան գյուղ կատարած այցի ժամանակ, որը մինչև 2020 թվականը գտնվում էր չճանաչված Լեռնային Ղարաբաղի Հանրապետության վերահսկողության տակ։ Այդ բնակավայրում Իլհամ Ալիևը կնոջ հետ մասնակցել է մզկիթի բացմանը, որի հիմքը դրվել է 2022 թվականին։ «Օկուպացիայի ժամանակ 67 մզկիթներից 65-ն ավերվել է։ Նոր մզկիթների կառուցումը նույնպես կարևոր տեղ է գրավում օկուպացիայից ազատագրված մեր տարածքներում ներկայումս իրականացվող լայնածավալ ստեղծագործական աշխատանքի շրջանակներում»,– ընդգծել է Ադրբեջանի նախագահի մամուլի ծառայությունը։
Հիշեցնենք, որ Լեռնային Ղարաբաղի տարածքը, որին նույնիսկ Երևանն անկախ չէր ճանաչել, Ադրբեջանի և Հայաստանի միջև կարճատև ռազմական հակամարտության արդյունքում անցավ Բաքվի վերահսկողության տակ։ Մի քանի օր առաջ էլ երկրները հայտարարել են, որ համաձայնության են եկել խաղաղության պայմանագրի բոլոր կետերի շուրջ, սակայն չեն նշել, թե երբ և որտեղ կարող է այն ստորագրվել։
Նյութը հրապարակման պատրաստեց Կամո Խաչիկյանը
