Լավ լուր. Արցախում ծանր վիրավորված 21-ամյա Հովհաննեսը սկսել է քայլել

Արցախում մայիսի 13-ին ծանր վիրավորված Հովհաննես Պողոսյանը սկսել է քայլել: Այս մասին NEWS.am-ի թղթակցին ասաց Հովհաննեսի մայրը` տիկին Գայանեն:

«Դեռեւս բռնելով է քայլում, բայց ահագին քայլել է: Մերսող բժիշկների համառության շնորհիվ է տղաս սկսել քայլել: Բժիշկներն էլ ասում են, որ հրաշք է տեղի ունեցել: Առաջիկայում արդեն կսկսի ձեռնափայտով քայլել, մասնագետները համոզված են, որ ինքնուրույն էլ կքայլի, բայց ժամանակ է հարկավոր»,- ասաց տիկին Գայանեն:

Հովհաննեսը դեռեւս չի կարողանում շարժել աջ ձեռքը, սակայն բժիշկները վստահեցնում են, որ լուծվող խնդիր է, պարզապես ժամանակ է հարկավոր: Նշենք, որ զինծառայողը սկսել է նաեւ բառեր արտաբերել, սակայն ամբողջական նախադասություններ կազմել դեռ չի կարողանում:

Հիշեցնենք, որ 21-ամյա Հովհաննեսը երկրորդ անգամ է վիրավորվել: Առաջին անգամ թեթեւ վնասվածք է ունեցել եւ հարազատների փոխանցմամբ, առանց սպասելու ամբողջությամբ ապաքինվելուն՝ նորից դիրքեր են բարձրացրել:

Հովհաննես Պողոսյանը ստացել է հրազենային միջանցիկ գանգուղեղային ծանր վիրավորում, գլխուղեղի սալջարդ, այլ բազմաբեկորային վնասվածքներ։ Վիրավորի մոտ առկա էր ուղեղային կոմա։ Արդեն երկու անգամ նա վիրահատվել է Երեւանում:

Ավելի վաղ NEWS.am-ը հայտնել էր, որ Հովհաննես Պողոսյանը ծանր վիրավորում է ստացել 2016թ. մայիսի 13-ին Պաշտպանության բանակի հյուսիսային ուղղությամբ տեղակայված զորամասերից մեկի պահպանության հենակետերից մեկում: