«Գլխավոր դատախազությունից պաշտպանություն եմ խնդրել». Ինչո՞ւ են թիրախավորում Արիանա Հովսեփյանին

«Վարդան Ղուկասյանը ձայնագրություն է հրապարակել, որն արդեն ամբողջությամբ ինձ մոտ է: Հանձնել ենք այն քննչական մարմիններին, նաև Գլխավոր դատախազությունից պաշտպանություն եմ խնդրել։ Չգիտենք, թե ինչ պատճառներով քննիչը մերժել էր, հիմա գրավոր դիմել ենք Գլխավոր դատախազին, ԱԱԾ-ի պետին, Քննչականի նոր ղեկավարին։ Արտակ Գալստյանի կուսակցության անդամ, քաղաքապետարանի ավագանու անդամ Վահան Ավագյանն ինչ-որ հանցագործություն է նախատեսում իմ դեմ»,- 1or.am-ի հետ զրույցում նշում է Newspress.am լրատվական կայքի հիմնադիր-տնօրեն Արիանա Հովսեփյանը: Նրա խոսքով, ձայնագրության մեջ շատ պարզ լսվում է, որ ցանկանում են ծանոթների, ընկերների միջոցով ինչ-որ հարցով դիմել իրեն, մի տեղ հրավիրել։

«Լրատվական կայք ունեմ, կարող են ինչ-որ խնդրանքով դիմել ինձ: Բնականաբար, կգնամ այդ հանդիպմանը, ինչ-որ հյուրասիրություն կլինի, թեկուզ սովորական ջուր կամ սուրճ և իմ բաժակի մեջ դեղ կգցեն: Թե ինչ կլինի դրանից հետո, չգիտեմ: Դրանից հետո ինձ կմերկացնեն, կպղծեն, մազերս կխուզեն և այլն: Այսինքն՝ այդ կոնֆետ ցրող Վահան Ավագյանն այդքան կա: Այսօր առավոտյան մեն-մենակով գնացի քաղաքապետարան: Այնտեղից ուղիղ եթեր մտա և ասացի՝ դե, Վահան Ավագյան, այդքան տղա ես, իջի ներքև, եկել եմ, որ ինձ պղծես։ Բնականաբար, Վահան Ավագյանը այդքան դուխ չունի, այդքան տղա չի, որ իջնի ներքև։ Ներքև իջան «Մայր Հայաստան» խմբակցության ավագանու անդամները ղեկավարի հետ և երկու անկախ ավագանիներ, ինչի համար շատ շնորհակալ եմ։ Նաև տեղեկացնեմ, որ մի շարք տիկտոկյան էջեր, որոնք, ըստ շրջանառվող լուրերի, պատկանում են Վահան Ավագյանին և Արտակ Գալստյանին, որը շորթման համար բանտ էր նստել, տղան՝ թմրադեղ վաճառելու, կինը՝ փողերի լվացման, պոռնոգրաֆիկ տեսանյութեր են սարքում և տարածում: Իմ նկարն են տեղադրում, չգիտեմ, թե որտեղից են վերցրել, որ իբրև թե մայրական իրավունքներից զրկված եմ, իբր մեկնել եմ Մոսկվա, Վրաստան, մարմնավաճառությամբ եմ զբաղվել, ինձ այնտեղ ձերբակալել են: Այս բոլոր էջերի մասին ինֆորմացիան ևս փոխանցել ենք համապատասխան մարմիններին»,-հավելում է մեր զրուցակիցը:

Նրա համար տարակուսելի է ընդդիմության լռությունը:

«Ընդդիմությունը չի՞ կարծում, որ այս ամենը մի օր կարող է իր դուռը չոքել։ Ընդդիմությունը չգիտես, թե ինչու լուռ է։ Չեմ պատկանում որևէ կուսակցության, պայքարում եմ իմ հայրենիքի համար։ Եթե ընդդիմության նման կուլտուրական կապիկություններ չեմ անում և կուլտուրական Նիկոլի հետ չեմ համագործակցում, ուրեմն ոչ ոք իմ կողքին չպե՞տք է կանգնի ընդդիմությունից»,-նշում է Հովսեփյանը։

Ինչո՞ւ են թիրախավորում Արիանա Հովսեփյանին: Գուցե պատճառը նրա քաղաքական ակտիվությունն է: «Քաղաքականության մեջ առհասարակ չկամ և չեմ ուզում այդ կեղտոտ քաղաքականության մեջ լինել։ Միգուցե այլ լեքսիկոնով՝ շատ կոպիտ, ագրեսիվ խոսում եմ ներկայիս իշխանության մասին, և իրենց դա դուր չի գալիս: Չեմ կարող շատ ու շատ ընդդիմադիրների նման կուլտուրական ստատուսներ գրել և ելույթներ ունենալ, որ աթոռ փախցնեմ կամ կուսակցությունից կուսակցություն սրա-նրա գիրկը ընկնեմ, որ աթոռ փախցնեմ: Իմ պայքարը իմ հայրենիքն ու իմ հողն է։ Եթե մի տեղ էլ հայհոյում եմ, լավ եմ անում, որովհետև այս հայհոյանքները մեզ սովորեցրեց Նիկոլի իշխանությունը, Նիկոլի նախիրը և Նիկոլի ֆեյքերը։ Որքա՞ն կարելի է ինձ թիրախավորել: Շնորհակալ եմ այն լրատվամիջոցներին, որոնք բարձրաձայնել են այն, ինչ կատարվել է ինձ հետ։ Բայց այսքան ժամանակ ոչ մի ձևավոր, «կապիկ» ընդդիմություն իմ մասին չխոսեց։ Ընդդիմությո՞ւնն էլ է ինձ թիրախավորել, որովհետև նա կարծում է, թե ով է Արիանան, ով է նրա մեջքը։ Այսինքն՝ եթե չեմ վախենում ոչ մեկից, մաքուր իմ կռիվը տալիս եմ իմ հայրենիքի համար, եթե իմ գլխին ղեկավար չկա, եթե փողով ստատուս չեմ գրում, փողով չեմ վազում այս ու այն կողմ, կուլտուրական ոտքս չեմ գցում ոտքիս վրա և էկրանների առաջ օրենքի սահմաններում խոսում, ուրեմն վա՞տն եմ, հայհոյո՞ղ եմ: Ընդդիմության դեմքը պատրաստվում եմ պատռել, որովհետև ինձ համար այլևս ընդդիմությունը Նիկոլ է և վերջ։ Եթե ընդդիմությունը որևէ մեկի կողքին չի կանգնում, միայն զբաղված է բամբասանքով, սրան-նրան փնովելով և էկրանի առաջ կուլտուրական ձևանալով, սիրով կպատռեմ բոլորի դեմքը: Ինձ այսքան թիրախավորում են, ոչ մեկ իմ կողքը չի կանգնում։ Կարող եմ հաշվել մի քանի մարդու, որոնց կյանքովս պարտական եմ։ Կգա ժամանակը, նրանց անունները կնշեմ»,-ընգծում է կայքի հիմնադիր-տնօրենը:

Եզրափակում է՝ Վահան Ավագյանը պետք է ձերբակալվի։

«Վահան Ավագյանը հանցագործ է, նա զբաղեցնում է քաղաքապետարանում ավագանու աթոռ: Այս ամենը, ինչ նախապատրաստում էին իմ նկատմամբ, նույնը կարող են անել յուրաքանչյուր հայ կնոջ նկատմամբ։ Հավելեմ՝ Դատախազությունը և Քննչականը հանկարծ չփորձեն այս հանցագործությունը ծածկադմփոց անել և ասել՝ դե խոսակցություն է, խոսել են, բայց դեռ չեն իրագործել։ Եթե այս ձայնագրությունը մեզ մոտ չհայտնվեր և այս աղմուկը չլիներ, այս ամենն իմ գլխին կսարքեին։ Այնպես որ, լոլոներ հանկարծ չանեն, որ խոսել են, բայց չեն իրագործել։ Կա ձայնագրություն, թե ինչ էին իրենք պատրաստվում անել իմ դեմ։ Այդ բանդան  ծրագրավորում է, թե ինչ անի իմ դեմ։ Բարեբախտաբար, այդ ամենը շատ շուտ իմացանք»: